«Երաժշտություն հանուն ապագայի» հիմնադրամի կրթաթոշակառու Էդուարդ Գևորգյանն ընդունվել է Զալցբուրգի Մոցարտեում համալսարան

Զալցբուրգի Մոցարտեում համալսարանը, որը հիմնադրվել է 1841 թ․-ին և անվանակոչվել ի պատիվ անվանի կոմպոզիտոր Վոլֆգանգ Մոցարտի, Ավստրիայի առաջատար երաժշտական ​​կրթօջախներից է: Այն առաջարկում է բազմազան ուսումնական ծրագրեր, այդ թվում՝ դասական երաժշտություն, օպերա, գործիքային արվեստ և այլն: Այստեղ սովորում են ուսանողներ ամբողջ աշխարհից: Մոցարտեումը կազմակերպում է համերգներ, վարպետության դասեր և փառատոներ՝ նպաստելով երաժշտական ​​արվեստի տարածմանը և մասսայականացմանը: Այստեղ տաղանդավոր երաժիշտները ստանում են բարձրագույն կրթություն, որն ունի միջազգային ճանաչում։

Եվ ահա այս հեղինակավոր համալսարան է ընդունվել «Երաժշտություն հանուն ապագայի» հիմնադրամի կրթաթոշակառու, դաշնակահար Էդուարդ Գևորգյանը։ Նա ստացել է ընդունելության առավելագույն՝ 25/25 միավոր։

Էդուարդն արդեն չորրորդ տարին է՝ երաժշտական այս մեծ ընտանիքի անդամն է։ Նա հասցրել է ելույթ ունենալ միջազգային բեմերում։ Այս տարվա մարտին Էդուարդը ներկայացրել է Հայաստանը հեղինակավոր Berliner Klavierfesttage փառատոնին և ելույթ ունեցել հանրահայտ Berliner Philharmoniker-ում:

Երիտասարդ դաշնակահարի հաջողությունները պայմանավորված են նրա տաղանդով ու աշխատասիրությամբ, բայց, իհարկե, սա նաև «Երաժշտություն հանուն ապագայի» հիմնադրամի հետ համատեղ աշխատանքի արդյունքն է։ Էդուարդի այս կարևոր ձեռքբերումը՝ հեղինակավոր Մոցարտեում համալսարան ընդունվելը վկայում է այն մասին, թե որքան կարևոր են այն մեծ ջանքերը, որոնք պատանի երաժիշտների կարողությունների զարգացման գործում ներդնում է «Երաժշտություն հանուն ապագայի» հիմնադրամը։ Հիմնադրամի ցանկացած կրթաթոշակառուի հաջողություն մղում է նրանց անել ավելին Հայաստանի տաղանդավոր երեխաների համար ճանապարհ հարթելու գործում։