Արա Աբրահամյանն աջակցելու փոխարեն մեղադրում է առևանգված հայ բլոգերին

Մոսկվայում հայ բլոգեր և գործարար Արեգ Շչեպիխինի առևանգումն ու հետագա զարգացումները ցնցել են ողջ Ռուսաստանը։ Հունիսի 3-ի երեկոյան Շչեպիխինին առևանգել էին Յարոսլավսկի երկաթուղային կայարանում. անհայտ անձինք բռնել էին նրան և խցկել սև Mercedes-ի բեռնախցիկ՝ թարթող լույսով և AMR համարանիշներով, որոնք օգտագործում են անվտանգության ուժերը։ Ոստիկանությունն առևանգման պահին ոչինչ չէր ձեռնարկել, բայց աելի ուշ հետապնդել էին այդ մեքենան, կանգնեցրել միայն Կիևի մայրուղու Մոսկվայի օղակաձև ճանապարհից երեք կիլոմետր հեռավորության վրա։ Շչեպիխինն ազատվելուց հետո պատմել էր, որ իրեն քաղաքից դուրս են տարել և ատրճանակի կոթով կոտրել ականջները։

Առևանգիչները եղել են Չեչնիայից, Կադիրովի կողմից ուղարկված ուժայիններ, իսկ Շչեպիխինը հայտնվել էր նրանց թիրախում՝ ուղիղ եթերում չեչենների ու մահմեդականության մասին տհաճ արտահայտություններ անելուց հետո։ Չեչնիայի իշխանությունները հայտարարել են, որ Շչեպիխինը չի առևանգվել, այլ կալանավորվել է։ Չեչնիայի ազգային քաղաքականության նախարար Ահմեդ Դուդաևը հիշեցրել է, որ բլոգերն իր տեսանյութերում վիրավորել է չեչեններին և մահմեդականությանը։ Թեպետ հայ բլոգերը, որ նախկինում Հարությունյան ազգանունն է կրել, ակնհայտորեն դաժան վերաբերմունքի էր արժանացել, նրա դեմ քրեական գործ են հարուցել, այժմ Արեգին մինչև վեց տարվա ազատազրկում է սպառնում։ Ձերբակալել են նաև առևանգիչներին։

Ռուսաստանի հայերի միության նախագահ Արա Աբրահամյանն իր ազգակցին պաշտպանելու կամ, գոնե, նրա կյանքի ու առողջության համար մտահոգվելու փոխարեն, չեչենների կողմից առևանգված հայ բլոգերին անվանել է «հոգեպես անառողջ»։ «Ակնհայտ է, որ Շչեպիխինը հոգեպես անառողջ է և բուժման կարիք ունի»,-հայտարարել է Աբրահամյանը` քննադատելով Շչեպիխինին։ ՌՀՄ նախագահին, կարծես, չի մտահոգում, որ Ռուսաստանում մարդուն կարող են առևանգել, խոշտանգել իր կարծիքն արտահայտելու համար, բայց, փաստացի արդարացնում է հային առևանգողներին։ Իհարկե, եթե հայ բլոգերը մեղավոր է, նրան կարող էին օրենքով սահմանված կարգով պատասխանատվության ենթարկել, այլ ոչ թե խոշտանգել։ Իսկ Արա Աբրահամյանի արարքը, իսկապես, անթույլատրելի և անհասկանալի է։

Եվա Տոնոյան