83 փամփուշտով ցան էր սարքել, դատարանի համար սովորական դեպք էր. սպանվածի մայրը դժգոհ է (ֆոտո)

2014թ. հուլիսի 18-ին ԼՂՀ ՊԲ զորամասերից մեկի պահպանության տեղամասի մարտական հենակետերից մեկում ծառայակցի կողմից գնդացրից արձակված 83 փամփուշտով սպանված Գեւորգ Ավագյանի մայրը դժգոհ է ՀՀ Վերաքննիչ քրեական դատարանի մարտի 14-ի որոշումից:

NEWS.am-ի հետ զրույցում Սիրանույշ Ավագյանը հայտնեց, որ իր հիմնական դժգոհությունը կապված է այն փաստի հետ, որ Վերաքննիչը որդու սպանության գործով մեղադրյալ Արմեն Սարգսյանին դատապարտեց ընդամենը 14 տարվա ազատազրկման`նրա արարքը չվերաորակելով որպես առանձնակի դաժանությամբ կատարված սպանություն:

«Որդուս 83 կրակոցով ցան էր սարքել, թիկունքից, առաջից կրակել է, բա առանձնակի դաժանությամբ չի՞ գործել սպանությունը: Ես իմ երեխայի վրա չեմ սգացել, նրան չեմ դիպել, դագաղը փակ է եղել: Բայց դատարանը որոշեց, որ առանձնակի դաժանություն չկա, սովորական դեպք է, երեք տարի ավելացրեց, ու վերջ»,-ասաց տիկին Սիրանուշը`դժգոհություն հայտնելով հայաստանյան դատական համակարգից:

Սպանված Գեւորգ Ավագյանի մայրը նշեց, որ շատ կցանկանար` որդու սպանության գործը հասցնել Մարդու իրավունքների եվրոպական դատարան, սակայն ֆինանսական միջոցների սղության պատճառով ընտանիքը դա անել չի կարող:

«Չենք կարող դիմել, ֆինանսական դժվարություններ ունենք, փաստաբանական ծախսերը հոգալ չենք կարող: Իմ որդուն սպանողի դատաստանը թողնում եմ Աստծո կամքին»,-ասաց տիկին Սիրանուշը:

Նշենք, որ Գեւորգ Ավագյանն Արագածոտնի մարզի Ոսկեվազ գյուղի բնակիչ էր:

Հիշեցնենք, որ ՀՀ Վերաքննիչ քրեական դատարանը մարտի 14-ին բեկանել է Սյունիքի մարզի ընդհանուր իրավասության դատարանի վճռի, որով Արմեն Սարգսյանը դատապարտվել էր 11 տարվա ազատազրկման` մեղադրայլի նկատմաբ 14 տարվա ազատազրկման պատիժ սահմանելով: Արմեն Սարգսյանը ընդունել է իր մեղքը` ասելով, թե Գեւոգի վրա կրակել է իրեն հայհոյելու համար: Մինչդեռ Գեւորգի մայրը պնդում է` հայհոյելու վերաբերյալ հարցաքննվել է ընդամենը մեկ վկա:

Ավելի վաղ NEWS.am-ը հայտնել էր, որ Լեռնային Ղարաբաղի ՊԲ հարավային ուղղությամբ տեղակայված զորամասերից մեկի պահպանության տեղամասի մարտական հենակետերից մեկում 2014. հուլիսի 18-ին մահացու հրազենային վիրավորում ստացած ժամկետային զինծառայող 20-ամյա Գեւորգ Ավագյանին սպանելու կասկածանքով ձերբակալվել է նրա ընկերը: Դեպքը տեղի է ունեցել առավոտյան ժամը 07:00-ի սահմաններում: ԼՂՀ ՊԲ-ն դեպքի մանրամասները պարզելու համար տանում է քննություն: Մահվան առթիվ հարուցվել է քրեական գործ՝ սպանության հատկանիշներով, ձերբակալվել է զինվորի ծառայակից ընկերը:

Լուսանկարում 14 տարվա ազատազրկման դատապարտված Արմեն Սարգսյանն է