«Տեխասյան ռենջերը». Փաշինյանը «միանշանակ» ավարտում է «ղարաբաղյան շարժումը»
ՔԱՂԱՔԱԿԱՆՈՒԹՅՈՒՆ
Ղարաբաղյան շարժումը չպետք է շարունակվի, հայտարարել է ՀՀ վարչապետ Նիկոլ Փաշինյանը ելույթ ունենալով երկրի խորհրդարանում, գրում է eadaily.com–ը:
«Ես դա անում եմ որպես ՀՀ վարչապետ, և եթե ՀՀ ժողովուրդը չհամաձայնի իմ հայտարարության հետ, ապա ես անմիջապես կդադարեմ լինել հանրապետության կառավարության ղեկավարը»,– ասել է նա:
«Դուք դեռ հոկտեմբերին Պրահայում դադարեցրիք ղարաբաղյան շարժումը, բայց շարժումը շարունակվում է։ Իհարկե, կարելի է Բաքվին հանձնել այդ շարժումը շարունակողներին։ Դուք, անշուշտ, կնախընտրեիք, որ այստեղ նստած լինեն արևմտյան ադրբեջանցիները, քան մենք: Համենայն դեպս, դուք դեռ չեք պատասխանել իմ հարցին՝ նշեք գոնե մեկ զիջում, որ արել է Ադրբեջանը»,– հարց է հնչեցրել ընդդիմադիր պատգամավոր Արթուր Խաչատրյանը հավելելով, որ Ղարաբաղյան շարժումը Նիկոլ Փաշինյանը չի սկսել, որ հիմա էլ որոշի դադարեցնել։
Փաշինյանն ի պատասխան կոչ է արել ծանոթանալ 1996 թվականի Լիսաբոնի գագաթնաժողովի փաստաթղթերին: «Եվ դուք կհասկանաք, որ այն ժամանակ ղարաբաղյան շարժումն արդեն ավարտվել էր, պարզապես ոչ ոք մեզ այդ մասին չի ասել, և մենք ինքներս խելք չենք ունեցել դա կարդալու և հասկանալու համար», - եզրափակել է վարչապետը:
Հարկ է հիշեցնել, որ Փաշինյանի քաղաքական մենթոր՝ ՀՀ առաջին նախագահ Լևոն Տեր-Պետրոսյանն իր ելույթներից մեկում շատ հանգամանորեն խոսել է այն մասին, թե ինչպես և ում կողմից է հենց այդ դիրքորոշումը լոբբինգ արվել ԵԱՀԿ Լիսաբոնի գագաթնաժողովի բանաձևում։ Լևոն Տեր-Պետրոսյանը 2021 թվականի մայիսի 26-ին Հայաստանի Հանրային հեռուստաընկերությանը տված հարցազրույցում շատ ուշագրավ հայտարարություն է արել: Պարզվում է, որ 1996 թվականի դեկտեմբերին Լիսաբոնում ԵԱՀԿ գագաթնաժողովում ընդունված ղարաբաղյան հակամարտության կարգավորման «հիմնական» բանաձևը, ինչպես սահմանվում է Բաքվում, լոբբինգ է արվել Տեխասի նավթարդյունաբերողների կողմից։
Հիշեցնենք նաև, որ եվրոպական դիվանագիտության նախկին ղեկավար Ժոզեպ Բորելը հայտարարել էր, որ Նիկոլ Փաշինյանը դարձել է առաջին հայ քաղաքական գործիչը, ով այդքան միանշանակորեն ճանաչել է Լեռնային Ղարաբաղը որպես Ադրբեջանի մաս։
«Սա առաջին անգամն է, որ Հայաստանի ղեկավարը, այս դեպքում Փաշինյանը, արտահայտվում է նման միանշանակ ձևով: Դա միանգամայն ոչ երկիմաստ է», - ընդգծել էր Բորելը։
Նյութը հրապարակման պատրաստեց Կամո Խաչիկյանը
