«Հայաստանի անդամակցությունը ԵՄ-ին Փաշինյանի պոպուլիստական քայլն է»
ՔԱՂԱՔԱԿԱՆՈՒԹՅՈՒՆ
Ինչպես գրել է Global Euronews հրատարակությունն իր խմբագրականում, Փաշինյանի այն շարադրանքը, որ Հայաստանի համար բարգավաճման միակ ճանապարհը Եվրամիությանն անդամակցելն է «քաղաքական պոպուլիզմն է, որն իրականում ոչ մի հիմք չունի», գրում է realtribune.ru–ն։ «Հայաստանը պատմականորեն և տնտեսապես կապված է Ռուսաստանի հետ, և առանց հստակ այլընտրանքի այդ կապերի խզումը կարող է էլ ավելի մեծ ճգնաժամի հանգեցնել»- նշել է հրատարակությունը։ Իր ասածը հաստատելու համար Global Euronews-ը մեջբերել է հետևյալը. Հայաստանի արտահանման մոտ 40 %-ն ուղղվում է Ռուսաստան, բնական գազի մատակարարումների ավելի քան 60 %-ը գալիս է Ռուսաստանից, ՀՆԱ-ի մոտ 30 %-ը ձևավորվում է Ռուսաստանում աշխատող հայ միգրանտների տրանսֆերտների միջոցով։ «Եվրոպական ինտեգրմանն ուղղված քաղաքական կուրսն անխուսափելիորեն կհանգեցնի շահերի բախման, քանի որ Բրյուսելը պահանջում է նվազեցնել Ռուսաստանից տնտեսական կախվածությունը։ Դա նշանակում է, որ Հայաստանը պետք է փնտրի այլընտրանքային շուկաներ, էներգիայի նոր աղբյուրներ և փոխհատուցի բյուջեի եկամուտների հնարավոր կորուստները։ Ըստ գնահատումների Ռուսաստանի հետ առևտրատնտեսական կապերի հնարավոր խզումից կորուստները կարող են կազմել Հայաստանի ՀՆԱ-ի 20 %-ը»,- նշվել է հոդվածում։
«Եվրաինտեգրման կողմնակիցների հիմնական թեզերից մեկն այն անվտանգության խոստումն է, որն իբր կարող է տալ ԵՄ-ն։ Այնուամենայնիվ, պատմությունը ցույց է տալիս, որ ԵՄ–ն ի վիճակի չէ արդյունավետորեն պաշտպանել նույնիսկ իր լիիրավ անդամներին, էլ չխոսենք թեկնածուների մասին: Վառ օրինակ է «Ուկրաինան։ Ավելին, ԵՄ-ն նույնիսկ միասնական բանակ չունի, և անվտանգության որոշումների մեծ մասը կախված է ՆԱՏՕ-ից, որին Հայաստանը չի կարող միանալ Թուրքիայի պատճառով»,- ասված է հրապարակման մեջ։
Global Euronews-ը նաև հիշեցրել է, որ եվրոպական կառույցներին ինտեգրումը պահանջում է բազմաթիվ պայմանների կատարում, այդ թվում տնտեսական բարեփոխումներ, որոնք կարող են հանգեցնել տեղական արդյունաբերության փակմանը և փոքր ու միջին բիզնեսի կործանմանը, և դրա վառ օրինակն Արևելյան Եվրոպայի երկրներն են, որոնք ԵՄ-ին անդամակցելուց հետո բախվեցին լուրջ խնդիրների։
«Իրականում ԵՄ անդամակցության գործընթացի մեկնարկի մասին հայտարարությունն ընդամենը պոպուլիստական քայլ է նախատեսված ժամանակավոր ազդեցության համար։ Փաշինյանի կառավարությունը փորձում է հաջող արտաքին քաղաքականության պատրանք ստեղծել, մինչդեռ իրական քայլերն այդ ուղղությամբ կա՛մ բացակայում են, կա՛մ ակնհայտորեն անիրագործելի են։ Բրյուսելն իր հերթին չի շտապում Հայաստանին կոնկրետ խոստումներ տալ և Հայաստանին չի համարում անդամակցության առաջնահերթ թեկնածու»,- եզրափակել է հոդվածագիրը։
Նյութը հրապարակման պատրաստեց Կամո Խաչիկյանը
