Հակամարտության պայմաններում ընտրություններ անցկացնելն անհնար է․ Զելենսկին նշել է պատճառները
ՄԻՋԱԶԳԱՅԻՆ
Պատերազմի ընթացքում Ուկրաինայում ընտրությունների անցկացումը շարունակում է անհնարին մնալ օրենսդրական սահմանափակումների և անվտանգության զգալի ռիսկերի պատճառով։
Այս մասին հայտարարել է երկրի նախագահ Վլադիմիր Զելենսկին «Ուկրաինա. «2025 թվական» մամուլի ասուլիսի ժամանակ:
Նրա խոսքով, ընտրությունների թեման ակտիվորեն առաջ է քաշվում Ռուսաստանի կողմից, հնչում ԱՄՆ-ի շուրթերով, մինչդեռ Ուկրաինայի միջազգային գործընկերները երբեք պաշտոնապես չեն բարձրացրել այդ հարցը։
Զելենսկին ընդգծել է, որ նույնիսկ ընտրությունների կազմակերպման համատեքստում անվտանգությունը կմնա գլխավոր առաջնահերթությունը։
«Ժողովրդավարական ընտրություններ անցկացնելու համար մենք պետք է երաշխավորենք դրանց անվտանգությունը, որպեսզի արդյունքները ճանաչվեն։ Ինչպե՞ս են մարդիկ քվեարկելու ճակատում կամ տարհանված տարածքներում: Սա հակասում է օրենքին և Սահմանադրությանը։ Ամենակարևորը անվտանգությունն է»,- ընդգծել է Զելենսկին։
Պետության ղեկավարը օրինակ է բերել գիշերային հարձակումներիս մեկը, երբ Ռուսաստանը Ուկրաինայի ուղղությամբ 267 անօդաչու թռչող սարք է ուղարկել։ Սա, նրա խոսքով, ցույց է տալիս Ռուսաստանի Դաշնության իրական մտադրությունները, որը փորձում է ավելի շուտ քաոս ստեղծել, քան ձգտել խաղաղության:
Նախագահը նշել է, որ ընտրությունների անցկացումը առաջնագծում, մասնավորապես Սումիի և Խարկովի մարզերում կամ Կուպյանսկում, չափազանց դժվար է։
«Ինչպե՞ս կարող ենք ընտրություններ կազմակերպել այնտեղ, որտեղ մարդկանց տարհանում են։ Ինչպե՞ս են քվեարկելու առաջնագծում գտնվող զինվորները: Ո՞վ է վերահսկելու գործընթացը մարտական գոտիներում, միջազգային դիտորդները կկարողանա՞ն աշխատել, օրինակ, Պոկրովսկում»,- հռետորական հարցեր է տվել Զելենսկին:
Նա նաև նշել է, որ ուկրաինացիների զգալի մասը գտնվում է արտերկրում, և նրանց համար ընտրատեղամասեր կազմակերպելը զգալի ռեսուրսներ և ժամանակ է պահանջում։
Ուկրաինայում նախագահական ընտրությունները պետք է տեղի ունենային նախորդ տարվա գարնանը, սակայն ռազմական դրության պատճառով չկայացան։
Քվեարկությունը հետաձգվեց, քանի որ երկրի սահմանադրությունը թույլ չի տալիս ընտրություններ անցկացնել ռազմական դրության պայմաններում, որը հայտարարվել էր 2022 թվականի փետրվարի 24-ին՝ այն օրը, երբ Ռուսաստանը լայնամասշտաբ ներխուժում սկսեց Ուկրաինայի ուղղությամբ՝ այն անվանելով «Հատուկ գործողություն»։
Ռուսաստանը, օգտագործելով ընտրությունների չկայացման այս փաստը, քանիցս հայտարարել է, որ Զելենսկիի լեգիտիմությունը «խիստ կասկածի տակ է»: Թրամփն ու վերջինիս վարչակազմը համաձայն է Պուտինի ու ՌԴ իշխանությունների պնդման հետ և կրկնել է ընտրությունների պահանջի մասին թեզը:
