Արևելագետը նշել է Ռուսաստանի նկատմամբ պատժամիջոցներին Հայաստանի միանալու պայմանը
ՎԵՐԼՈՒԾՈՒԹՅՈՒՆՆԵՐ
Եթե Հայաստանը միանա Եվրամիությանը, ապա ստիպված կլինի ամբողջությամբ պատժամիջոցներ կիրառել Ռուսաստանի դեմ, ինչը վերջ կդնի Մոսկվայի հետ առևտրին, News.ru-ի հետ զրույցում ասել է ՄԳԻՄՕ-ի Կովկասյան խնդիրների և տարածաշրջանային անվտանգության կենտրոնի առաջատար գիտաշխատող Նիկոլայ Սիլաևը։ Նրա խոսքով Հայաստանը չի կարող լինել և՛ ԵՄ, և՛ ԵԱՏՄ անդամ:
«ԵՄ-ի և ԵԱՏՄ-ի շրջանակներում համագործակցությունը անհնար է համատեղել, քանի որ դրանք ազատ առևտրի գոտիներ են, որոնք իրենց շուկաները պաշտպանում են մյուս գոտու ապրանքներից։ Եթե Հայաստանը միաժամանակ լինի դրանց մեջ, մաքսային պաշտպանության մեջ փոս կառաջանա։ Ավելին, եթե Երևանը միանա ԵՄ ազատ առևտրի գոտուն, ապա ԵՄ-ի խնդրանքով ստիպված կլինի ամբողջությամբ միանալ Ռուսաստանի դեմ պատժամիջոցներին։ Դա կլինի Ռուսաստանի հետ Հայաստանի առևտրի, ինչպես նաև հանրապետության Եվրասիական միությանը մասնակցության ավարտը»,- ասել է Սիլաևը։
Եթե Երևանը ընտրի եվրոպական ուղին, ապա չի կարողանա արագ վերականգնել իր տնտեսությունը և կկանգնի ինչպես տնտեսական, այնպես էլ սոցիալական լուրջ հետևանքների առաջ, նկատել է արևելագետը։ Նրա խոսքով Ռուսաստանն է այդ երկրի առանցքային գործընկերը։ «Ռուսաստանն ընդհանրապես Հայաստանի առանցքային, եթե չասենք ամենամեծ առևտրային գործընկերն է։ Դրա հետ մեկտեղ Հայաստանի և ԵԱՏՄ այլ երկրների ապրանքաշրջանառությունը հանրապետության արտաքին առևտրի ահռելի մասն է կազմում։ Բացի այդ, Երևանը ռուսական էներգառեսուրսներն է գնում էժան գներով, չպետք է նաև մոռանալ ԵԱՏՄ աշխատաշուկա ազատ մուտք գործելու հնարավորության մասին»,- հավելել է փորձագետը։
Հիշեցնենք, որ ավելի վաղ ՌԴ Դաշնային խորհրդի միջազգային հարցերով կոմիտեի փոխնախագահ Անդրեյ Կլիմովը News.ru-ի հետ զրույցում հայտարարել էր, որ Եվրամիությանն անդամակցելուց հետո Հայաստանը կարող է դժվարությունների առաջ կանգնել։ Նա հիշեցրել էր Բուլղարիայի և Ուկրաինայի նախկին փորձը, որոնք նույնպես ցանկանում էին անդամակցել ԵՄ-ին, բայց միայն կորուստներ ունեցան։ Սենատորը նշել էր, որ նման հարց լուծելիս անհրաժեշտ է հաշվի առնել ողջ հայ ժողովրդի կարծիքը։
Նյութը հրապարակման պատրաստեց Կամո Խաչիկյանը
