Jerusalem Post. Իսրայելը պետք է աջակցի Ադրբեջանին ընդդեմ Հայաստանի և Իրանի
ՄԻՋԱԶԳԱՅԻՆ
Իսրայելը պետք է օգնի Ադրբեջանին իրագործել Հայաստանի նկատմամբ իր բոլոր տարածքային պահանջները, քանի որ դա բխում է հրեական պետության շահերից։ Նման կարծիք է հայտնել հոդվածագիր Մորդեխայ Կեդարը իսրայելական The Jerusalem Post խոշոր հրատարակության համար իր հոդվածում, գրում է Eadaily.com–ը։ Այսինքն, հեղինակը կոչ է արել պաշտոնական Թել Ավիվին օգնել Բաքվին օկուպացնել Հայաստանը. «Իսրայելը պետք է աջակցի Զանգեզուրի միջանցքի նկատմամբ վերահսկողություն սահմանելու Ադրբեջանի ծրագրերին, քանի որ դա կխզի Իրանի և Հայաստանի միջև տարածքային կապը, և դա բխում է Իսրայելի շահերից»։
Հոդվածում նշվել է, որ Ադրբեջանը Իսրայելի անվտանգության կարևոր տարր է։ «Ի վերջո, դա միակ բարեկամ պետությունն է, որը սահմանակից է Իսլամական Հանրապետությանը և թույլ է տալիս Իսրայելին օգտագործել իր տարածքը հետախուզական նպատակներով և, հնարավոր է, գործողություններ իրականացնելու համար»,- գրված է հոդվածում։
Հարկ է նշել, որ իսրայելցի փորձագետների կարծիքները Հայաստանի դեմ Ադրբեջանին աջակցելու վերաբերյալ արմատապես տարբերվում են։ Հունվարի 27-ին նույն Jerusalem Post-ը հրապարակել էր Կեդարի հակառակորդներ Դեն Փերիի և Գիլեդ Շերի հոդվածը։ Նրանց կարծիքով, Ադրբեջանի հարձակումը Հայաստանի վրա կլինի ագրեսիա, որին Իսրայելը չպետք է օգնի կամ աջակցի, քանի որ դա կխախտի Հայաստանի ինքնիշխանությունը և արմատապես կփոխի տարածաշրջանային հավասարակշռությունն այնպես, որ ուղղակիորեն օգուտ կբերի Թուրքիային։ «Այդ միջանցքը Թուրքիան կապելով Ադրբեջանի և Կենտրոնական Ասիայի հետ կընդլայնի թուրքական ազդեցությունը ողջ տարածաշրջանում։ Հաշվի առնելով այն, որ Թուրքիան կարող է հսկայական ազդեցություն ունենալ սիրիական նոր վարչակարգի վրա, թուրքական այդ գոտին կձգվի Կենտրոնական Ասիայից մինչև Հոլանի բարձունքների սահման»,- գրել էին Բաքվին աջակցելու հակառակորդները:
Նյութը հրապարակման պատրաստեց Կամո Խաչիկյանը
