Տարեց երևանցիներին ստիպում են լքել իրենց տները, հարկերն անհասանելի են. Հայաստանի վարչապետը կարծում է, որ մայրաքաղաքի կենտրոնում թոշակառուների համար տեղ չկա
ՔԱՂԱՔԱԿԱՆՈՒԹՅՈՒՆ
Հասարակական տրանսպորտի թանկացումից հետո Հայաստանի աղքատ բնակիչներին սպասվում է ևս մեկ հարված՝ գույքահարկի բազմակի բարձրացումը, գրում է mk.ru–ն։ Դրույքաչափերի բարձրացման արդյունքում Երևանի կենտրոնում բնակարան ունեցող թոշակառուները կարող են ստիպված լինել վաճառել իրենց տները և տեղափոխվել, քանի որ չեն կարողանա վճարել հարկը։ Ի դեպ, դա հենց այն խորհուրդն է, որ տվել է ՀՀ վարչապետ Նիկոլ Փաշինյանը տարեց քաղաքացիներին։ Նա նրանց խորհուրդ է տվել տեղափոխվել ավելի էժան տարածքներ, կամ նույնիսկ ընդհանրապես հեռանալ մայրաքաղաքից։ Նա հարկերի բարձրացումը բացատրում է մայրաքաղաքում անշարժ գույքի թանկացմամբ։
Այս ամենն արդեն բողոքի տեղիք է տվել ընդդիմության ճամբարում։ «Այլընտրանքային նախագծեր» խմբի համահիմնադիր Վահե Հովհաննիսյանը կարծում է, որ «վարչապետը չափազանց խեղաթյուրված է պատկերացնում անշարժ գույքի շուկայի օրենքները, և նա իրավունք չունի մարդկանց տեղափոխելու կոչ անել»։ Իսկ «Հայաստան» դաշինքի պատգամավոր Թադևոս Ավետիսյանը հայտնել է նաև, որ Երևանի կենտրոնում բնակվողը 2024 թվականին գույքահարկ է վճարել 300.000 դրամ (715 եվրո), 2025 թվականին վճարելու է 450.000 դրամ (ավելի քան 1000 եվրո), իսկ մյուս տարի 600.000 դրամ (1000 եվրո): Միևնույն ժամանակ, ըստ նրա, «վերջին երեք տարվա ընթացքում նման բնակարանի արժեքը մոտ 50 տոկոսով չի աճել»։
Արդյունքում, ինչպես Ավետիսյանն է ասել, «քաղաքի կենտրոնում մենակ ապրող տարեց քաղաքացին իր տանը, որը ժառանգել է պապից, պետք է ծածկի գույքահարկն իր ամբողջ տարեկան թոշակով։ Եվ դա միայն նրա համար, որ կարողանա ապրել սեփական բնակարանում»։ Հիշեցնենք, որ 2024 թվականին Հայաստանում միջին կենսաթոշակը կազմում էր 50 հազար դրամ։ Այսինքն հարկի արժեքը հավասար է կենսաթոշակառուի տարեկան եկամուտին։
Նյութը հրապարակման պատրաստեց Կամո Խաչիկյանը
