Թմրամիջnցների վաճառքը «Telegram»-ով շարունակվում է

Թմրամիջոցի վաճառքը «Տելեգրամ» հավելվածի միջոցով, կարծես, դարձել է սովորական երևույթ, իսկ ի՞նչ է անում ՆԳՆ–ն.․․

Մոտ մեկ ամիս առաջ MediaHub-ի լրագրողը «Տելեգրամ» հավելվածով տարօրինակ հաղորդագրություն էր ստացել «А...»՝ վստահաբար կեղծ անունով օգտատիրոջից։ Հաղորդագրության մեջ տեսանյութ էր և կայքի հղում, տեսանյութը դիտելուց պարզվեց, որ թմրամիջոցների տարածմամբ և վաճառքով զբաղվող կայքի հետ գործ ունեինք,  որտեղ առաջարկում էին գնել տարբեր տեսակի թմրամիջոցներ։ ՆԳՆ–ից մեզ պատասխանել էին, թե կառույցը տեղյակ է և աշխատանքներ են տարվում։

Սակայն, ՆԳ նախարար Արփինե Սարգսյանը, ըստ երևույթի, այնքան զբաղված է, որ այսպիսի փոքր կայքերին ու էպիզոդներին ուշադրություն չի դարձնում: Պարզվեց, որ կայքը շարունակում է գործել, հանգիստ արգելված միջոցների վաճառք իրականացնել. ահազանգ ունենք մեր ընթերցողից, որից պարզ է դառնում, որ խնդիրը լուծված չէ։

««Տելեգրամ» հավելվածիս հաղորդագրություն եկավ С... անունով օգտատիրոջից, բացեցի, իսկ այնտեղ տեսանյութ և կայքի հղում էր: Տեսանյութը նայելուց հասկացա, որ թմրամիջոցների տարածմամբ և վաճառքով զբաղվող կայք է, թե ինչպե՞ս են ինձ ուղարկել, ինչո՞ւ ՆԳՆ ոչինչ չի անում, պարզ չէ։ Այսպես են անում, այս կայքը ուղարկում են, օրինակ, 15 տարեկան երեխային, իսկ եթե նա այդպիսի հաղորդագրություն ստանա, իսկ եթե ցանկանա գնե՞լ, ինչո՞ւ չեն զբաղվում»,- նշեց մեզ ահազանգած քաղաքացին։

Արդյո՞ք ՆԳՆ-ն չի գտել այդ օգտատիրոջը մեր ահազանգից հետո․ MediaHub-ը փորձեց ճշտել, թե ի՞նչ զարգացումներ կան այս գործով։ ՆԳՆ-ից պատասխանեցին, որ աշխատանքներ են տարվում և զբաղվում են։ Փաստացի, ՆԳՆ-ն այնքան դանդաղ է այդ ամենով զբաղվում, որ հնարավորություն է տալիս հանցագործներին անթաքույց առաջ տանել իրենց սև գործը և օրը ցերեկով ազատ թմրամիջոցների վաճառք իրականացնել ՀՀ–ում։

Նշենք, որ «Տելեգրամով» թմրանյութ վաճառելը, ցավոք, շատ տարածված երևույթ է, այս տարիների ընթացքում բավականին շատ են եղել դեպքերը, որ ՀՀ քաղաքացիները «Տելեգրամ»-ով թմրանյութ իրացնելու նպատակով գրանցված անհայտ օգտատերերից ձեռք են բերել թմրամիջոցներ, նախապես փաթեթավորել և տեղադրել դրանք Երևան քաղաքի տարբեր հասցեներում, ինչպես նաև ՀՀ մարզերում։

ՆԳՆ-ից ավելի վաղ հայտնել էին, որ շատ են դեպքերը, որ թմրամիջոցների ապօրինի շրջանառությամբ զբաղվող հանցավոր խմբի անդամները բացահայտվել են, ձերբակալվել, սակայն փաստ է, որ թմրամիջոցների տարածումը շարունակում է մնալ ՀՀ ՆԳՆ օրակարգի գլխավոր հարցերից մեկը, հատկապես, որ այս հարցում հաջողությունները քիչ են: Իսկ ամենաողբերգականն այն է, որ թմրամիջոցների ապօրինի վաճառքը մտել է նաև կրթական հաստատություններ...