Հայաստանի բոլոր դպրոցները կգործեն ԿԳՄՍ նախարարության ենթակայության ներքո. նախագիծ. «Փաստ»

«Փաստ» օրաթերթը գրում է.

ԿԳՄՍ նախարարությունն առաջարկում է փոփոխություններ և լրացումներ կատարել «Կրթության մասին»,«Հանրակրթության մասին», «Պետական ոչ առևտրային կազմակերպությունների մասին», «Տեղական ինքնակառավարման մասին», «Տարածքային կառավարման մասին» օրենքներում: Նպատակն է՝ «...հնարավորինս սեղմ ժամկետներում աշխատանքներ իրականացնել բոլոր դպրոցների՝ կրթության, գիտության, մշակույթի և սպորտի նախարարության ենթակայությամբ գործելու ուղղությամբ», ինչպես նաև՝ «դպրոցների համապատասխան բովանդակային կառավարումը կրթության, գիտության, մշակույթի և սպորտի նախարարությանը, իսկ տնտեսական մասը մարզպետարաններին հանձնելու ուղղությամբ»:

2024 թ. դրությամբ, Հայաստանի Հանրապետությունում հանրակրթական ուսումնական հաստատությունները գործում են տարբեր ենթակայությամբ, որի հիմնական սկզբունքը կրթական աստիճանն է և հաստատությունների աշխարհագրական բաշխվածությունը: Մասնավորաբար՝ տասը մարզերում կրթական 1-ին և 2-րդ աստիճանի հաստատությունները (313 հիմնական դպրոց), ինչպես նաև գյուղական բնակավայրերում՝ միջնակարգ դպրոցները (745 1-12-րդ դասարաններ) գործում են մարզպետարանների աշխատակազմերի ենթակայությամբ, Երևանում կրթական 1-ին և 2-րդ աստիճանի հաստատությունները (140 հիմնական, 13 միջնակարգ դպրոց) գործում են Երևանի քաղաքապետարանի ենթակայությամբ, կրթական 3-րդ աստիճանի հաստատությունները՝ 98 ավագ դպրոց, 10 վարժարան, 12 միջնակարգ, 3 հիմնական դպրոցները գործում են կրթության, գիտության, մշակույթի և սպորտի նախարարության ենթակայությամբ:

Նշվում է, որ դպրոցների ենթակայության փոփոխությունը ԿԳՄՍՆ-ի համար էապես մեծացնելու է աշխատանքների ծավալը: Ներկայումս համակարգվող 123 պետական հանրակրթական, թվով 14 մասնագիտացված և հատուկ դպրոցների փոխարեն համակարգվելու են 1343 դպրոցի աշխատանքները, սակայն մյուս կողմից դիտարկելով՝ այն հնարավորություն կտա ապահովել միասնական, որակյալ և արդյունավետ քաղաքականության իրականացում։

«Հանրակրթության մասին» օրենքի և հարակից օրենսդրական փոփոխությունների արդյունքում նախագծերի ընդունմամբ կառաջանա լրացուցիչ ֆինանսական միջոցների անհրաժեշտություն։ Պետական բյուջեի եկամուտներում և ծախսերում նախատեսվում է փոփոխություն: Մասնավորապես, ԿԳՄՍ նախարարության աշխատակազմում մոտ 30 նոր հաստիքի ավելացման արդյունքում, ըստ նախնական հաշվարկների՝ անհրաժեշտ գույքի, սարքավորումների (մեկանգամյա ծախսեր) համար կպահանջվի մոտ 32 մլն 860 հազար դրամ, իսկ շարունակական տարեկան ծախսը կկազմի շուրջ 145 մլն 590 հազար դրամ։

Մանրամասները՝ «Փաստ» օրաթերթի այսօրվա համարում