Փաշինյանը պատրաստվում է խորհրդարանական ընտրություններին

Մինչ հայրենական ընդդիմությունը կրկին զբաղված է իրար բզկտելու, իրար դեմ կոմպրոմատներ հրապարակելու, միմյանց անվանարկելու բացառապես անօգուտ և վտանգավոր գործունեությամբ, գործող իշխանությունները՝ Նիկոլ Փաշինյանի գլխավորությամբ, այլևս անթաքույց պատրաստվում են ցանկացած տեսակի ֆորս-մաժորային իրավիճակների, հատկապես՝ խորհրդարանական արտահերթ ընտրությունների։

Ամանորի առաջին ժամերից սկսած Նիկոլ Փաշինյանն իր ուղերձներով ու տեսանյութերով շարունակում է իր վնասակար նարատիվներն առաջ մղելու գործը։ Պետք է արժանին մատուցել նրա հետևողականությանը, որ որևէ րոպե հանրությանը չի թողնում դուրս գալ իր օրակարգերից, անընդհատ փորձում է հանրության մեջ կեղծ ու ապազգային թեզեր սերմանել, պահել ընկճախտի ու պարտվածի հոգեբանության ճիրաններում։ Հատկապես, օրերս «հերոսի» և հերոսականության մասին իր հերթական տեսանյութով Փաշինյանը կրկին առաջ քաշեց այն թեզը, որ հերոսությունը պետք է առօրեականացվի: «Մեր միջինացված ընկալման համաձայն հերոսն առանձնահատուկ վարքագծի, մտածողության, միջավայրի մարդ է»,- գրել էր նա և հավելել. «Սրա խորքային նպատակն ու իմաստը հերոսության առօրեականացումն է և առօրյայի հերոսականացումը, որ հերոսությունը դառնա հանրամատչելի, հասանելի յուրաքանչյուրին, որ հերոսությունը լինի համատեղելի կյանքի հետ»:

Տասնամյակներ և հարյուրամյակներ շարունակ ձևավորված ազգային արժեքների դեմ իր հարվածներով էլ Նիկոլ Փաշինյանը փորձում է նոր, խեղճացած, հերսականությունից զրկված հանրույթ ստեղծել, որին հնարավոր կլինի քշել, ուր ցանկանա։ Ի վերջո, արժեքներն են, որ ազգ ու պետություն են ստեղծում, դրանց խաթարումն էլ բերելու է պետության ընկալման կորստի։ Նման նարատիվներով գործող իշխանությունը հանրությանը պատրաստում է նոր ընտրությունների, նոր իշխանազավթման։

Իսկ ընդդիմությունը բոլորովին այլ հարց է, որ մինչ օրս չի կարողանում դուրս գալ իրար վնասելու, իշխանությանը սպասարկելու տեղապտույտից՝ չհասկանալով, որ դրանով միայն թելում է Փաշինյանի թելը։

Շողեր Ոսկանյան