Բանակում 7 ինքնասպանություն է եղել

Անցնող 2024-ին բանակում ինքնասպանության 7 դեպք է արձանագրվել, յոթերորդը Ռազմական ոստիկանության Իջեւանի ստորաբաժանման կարգապահական վաշտում էր` 19-ամյա Նարեկ Գրիգորյանը հայտնաբերվել էր կախված վիճակում։ 9 ժամկետային զինծառայող կյանքից զրկվել է խաղաղ պայմաններում` ոչ հակառակորդի կրակոցից, իսկ, առհասարակ, 24 թվականին ոչ մարտական պայմաններում զինծառայողների մահվան 34 դեպք է արձանագրվել։ ՊՆ-ն մահվան դեպքերի վերաբերյալ վերջին անգամ թվեր հրապարակել էր հոկտեմբերի վերջին։ Նորմալ երկրում, այս վիճակագրության արդյունքում, առնվազն Ռազմական ոստիկանության պետը, նրա ենթակաները պաշտոնանկ կարվեին, սակայն սա Հայաստանն է, իսկ երկրի վարչապետը՝ Նիկոլ Փաշինյանը։ 

«Հրապարակ»-ին հայտնի դարձավ, որ 19-ամյա Նարեկ Գրիգորյանի ինքնասպանությունից հետո ծառայողական քննություն է նշանակվել, որով պայմանավորված՝ կասեցվել են Ռազմական ոստիկանության կարգապահական վաշտի հրամանատարի, եւս երկու աշխատակցի լիազորությունները։ Ընդ որում՝ փաստ չէ, որ այս մարդիկ առհասարակ կապ ունեն զինվորի ինքնասպանության հետ, նրանք պատժվել են՝ ծառայության կազմակերպումը ոչ պատշաճ ձեւով իրականացնելու պատճառով։ Այսինքն՝ փաշինյանական մեղավորներին դրսում գտնելու տրամաբանությունը սահուն մտել է զինված ուժեր, եւ գլխավոր մեղավորները մնում են անպատիժ։ 

Պաշտպանության փոխնախարար Արման Սարգսյանն աղճատված, կցկտուր պատասխան տվեց հարցին, թե ինչու են ժամկետային զինծառայողները բանակում ինքնասպանություն գործում։ «Մտահոգում են մեզ, պատճառներն ուսումնասիրվում են։ Նախորդ տարիների համեմատությամբ այս տարի նվազում ունենք»,- նշեց նա։ Բանակում լրջագույն խնդիր է դարձել թմրամոլության ու խաղամոլության տարածումը։ Սարգսյանը վստահեցնում է, թե այս առումով էլ է նախարարությունն ուշադիր․ «Ամեն ինչին էլ ուշադրություն դարձնում ենք»։

Փորձե՞լ են պարզել, թե ինչպես է Ռազմական ոստիկանությունում ինքնասպան եղել 19-ամյա ժամկետային զինծառայողը, ինչ հոգեբանական վիճակի են հասցրել, որ նման քայլի է դիմել։ Փոխնախարարը հարցն ուղղեց Քննչական կոմիտեի դաշտ։ «Վարույթ է գնում։ Մենք ամեն ինչ անում ենք, որ նման դեպքեր այլեւս չլինեն»,- ասաց նա։
Ծնողն ինչպե՞ս ուղարկի իր որդուն ծառայության, երբ անգամ խաղաղ պայմաններում զինվորը չի վերադառնում տուն, մեկն ինքնասպանության է դիմում զորամասում, մյուսը ծառայակիցների բռնության զոհն է դառնում։ Պաշտպանության եւ անվտանգության հանձնաժողովի փոխնախագահ, ՔՊ-ական պատգամավոր Արմեն Խաչատրյանն այս հարցին ի պատասխան նկատեց՝ բանակը հասարակության արտացոլանքն է, ինչ կա հասարակության մեջ, ավելի խտացված գույներով տեսնում ենք բանակում։

«Ինքնասպանությունները նաեւ քաղաքացիական կյանքում հաճախ հանդիպող երեւույթներ են, եւ այստեղ պետք է համակարգային միջոցառումներ իրականացնել՝ դպրոցից սկսած։ Բանակը պետք է լինի այն տեղը, որտեղ 2 տարի ծառայելուց հետո տղամարդը պետք է դուրս գա հոգեպես ավելի առողջ, կայուն գիտելիքներով ավելի բարձր, ֆիզիկապես ավելի ուժեղացած։ Սա պետք է մենք խնդիր համարենք, որպեսզի բանակում ֆիլտրվեն ավանդույթից եկած խնդիրները»,- ասաց նա։ Վերջին տարիներին բանակ ներթափանցած աննախադեպ ծավալների թմրանյութն ու խաղամոլությունը, ըստ Խաչատրյանի, կրկին հասարակության արտացոլանքն են։ 

«Այն, ինչ անում են դրսում, դրա մի քիչ պակասը, ըստ իրավիճակի, անում են նաեւ բանակում, զինծառայության ընթացքում։ Եթե մարդը 19 տարի իր ընտանիքում դաստիարակություն չի ստացել կամ պատշաճ դաստիարակություն չի ստացել, դա արտացոլվելու է բանակում։ Բանակը պետք է համալրվի այնպիսի բազային կրթությամբ սպաներով, որոնք ի վիճակի կլինեն այս մեթոդական խնդիրները լուծել»,- ասաց Խաչատրյանը՝ այդպես էլ չնշելով այն անձանց անունները, ովքեր պատասխանատու են զինված ուժերում ինքնասպանությունների համար։

 © 2008 - 2021 «Հրապարակ օրաթերթ»