Դաշինքային սառեցում. Հայաստանը չի պատրաստվում դուրս գալ ՀԱՊԿ-ից
ՔԱՂԱՔԱԿԱՆՈՒԹՅՈՒՆ
Այս փուլում Հայաստանը չի նախատեսում ամբողջությամբ դուրս գալ ՀԱՊԿ-ից, Iz.ru-ին ասել է երկրի խորհրդարանի խոսնակ Մովսես Հարությունյանը, բայց միևնույն ժամանակ Երևանը դեռ չի ծրագրում ապասառեցնել իր մասնակցությունը կազմակերպությունում։ Միաժամանակ ռուսական կողմը ելնում է նրանից, որ Հայաստանը մնում է կառույցի լիիրավ անդամ։ Փորձագետների կարծիքով, Հայաստանը կարող է ապագայում վերադառնալ կազմակերպությանը, քանի որ Երևանն անվտանգության այլ երաշխավորներ չունի։
Վերջին շրջանում Երևանի ընտրած արտաքին քաղաքական կուրսից դժգոհ քաղաքացիների թիվը գնալով ավելանում է, Iz.ru-ի հետ զրույցում ասել է ընդդիմադիր Հայաստան խմբակցության պատգամավոր Գեղամ Մանուկյանը։
«Կառավարության ներկայացուցիչները հաճախ հանդես են գալիս Եվրամիության հետ սերտ համագործակցության օգտին, սակայն վերջերս նրանք սկսել են [խորհրդարանում] քննադատել մի քանի կուսակցությունների, որոնք ստորագրություններ էին հավաքում ԵՄ-ին միանալու հանրաքվեի համար: Ինչպե՞ս կարող է հանրաքվեն լուծել այդ հարցը, եթե ԵՄ-ում ոչ ոք պատրաստ չէ ընդունել Հայաստանին»,- ասել է պատգամավորը` ավելացնելով, որ, համենայնդեպս, երկրի լիակատար դուրս գալը ՀԱՊԿ-ից, այսպես թե այնպես, ենթադրում է անվտանգության նոր երաշխավորի որոնում։ «Բայց այդպիսի երաշխավոր չկա։ Եվ, հետևաբար, անհասկանալի է Հայաստանի ղեկավարության ներկայիս դիրքորոշումը։ ՀԱՊԿ-ի հետ վիճելի հարցերը պետք է լուծվեն կազմակերպության հետ միասին: ՀԱՊԿ-ի կողմից դիրքորոշումը միանշանակ է, ուստի այս բոլոր խնդիրները լուծելու համար երկխոսությունը պետք է բաց լինի»,- ավելացրել է նա։
Պատգամավորի խոսքով, հենց երաշխավորի բացակայության պատճառով էլ Հայաստանը դեռ կշարունակի համագործակցել ՀԱՊԿ-ի հետ այն ձևաչափով, որը կա ներկայումս, իսկ ապագայում անգամ կարող է նույնիսկ վերադառնալ կազմակերպություն: Իրավիճակը կարող է փոխվել արդեն հաջորդ տարի,Iz.ru-ին ասել է քաղաքագետ Իքբալ Դուրրեն։ «Կարծում եմ, որ հաջորդ տարի աշխարհում լարվածությունը կտեղափոխվի Մերձավոր Արևելք՝ Իրան։ Հայաստանին անվտանգության երաշխիքներ են պետք: Նա չի կարող դառնալ ՆԱՏՕ-ի անդամ, իսկ Ֆրանսիան չի կարող հանրապետությանն անվտանգության երաշխիքներ տրամադրել, կարծում եմ, որ այսպես թե այնպես Հայաստանը կվերադառնա ՀԱՊԿ»,- հավելել է նա։
ՀԱՊԿ-ի նկատմամբ Հայաստանի հավակնություններն անհիմն են, Iz.ru-ին տված հարցազրույցում նշել է Ապպլիկատա ռազմավարական որոշումների կենտրոնի (Ղրղզստան) տնօրեն Կուբաթբեկ Ռախիմովը։ Նրա խոսքով, ներկայիս սառեցված վիճակը կպահպանվի այնքան ժամանակ, քանի դեռ Երևանը փոփոխություններ չի կատարել սահմանադրության մեջ և չի հանել Ղարաբաղի հիշատակումը, ինչպես նաև մինչև Ադրբեջանի հետ խաղաղության պայմանագիր կնքելը։
«Դրանից հետո սառեցման շրջանը կավարտվի։ Հայաստանը դուրս չի գա ՀԱՊԿ-ից, քանի որ դա լուրջ հետևանքների կունենա իշխանության համար, քանի որ երկրում որոշ մարդիկ կտրականապես դեմ են Երևանի արտաքին քաղաքականության նման շրջադարձերին»,- ավելացրել է նա։
Չպետք է մոռանալ, որ Գյումրիում և Երևանում ռուսական ռազմաբազա է տեղակայված 1995 թվականից, և 2010 թվականի պայմանագրերով այն հանրապետության տարածքում կմնա մինչեւ 2044 թվականը։ Ռուսաստանը հավատարիմ է մնում իր պարտավորություններին` ապահովելու Հայաստանի անվտանգությունը ինչպես երկկողմ ձևաչափով, այնպես էլ ՀԱՊԿ-ի միջոցով, ավելի վաղ ասել էր Երևանում ՌԴ դեսպան Սերգեյ Կոպիրկինը։ «Մենք հավատարիմ ենք այն դիրքորոշմանը, որ ռուս-հայկական դաշնակցային փոխգործակցության, այդ թվում՝ ՀԱՊԿ շրջանակներում, համեմատելի իրական այլընտրանքներ չկան»,- ընդգծել էր նա։
Նյութը հրապարակման պատրաստեց Կամո Խաչիկյանը
