Ավատկովը Հայաստանում ստեղծված իրավիճակի մասին. ՆԱՏՕ-ն ի դեմս Թուրքիայի, ակտիվորեն ճանապարհ է հարթում դեպի Կասպից ծով
ՔԱՂԱՔԱԿԱՆՈՒԹՅՈՒՆ
ՆԱՏՕ-ն ի դեմս Թուրքիայի, ակտիվորեն ճանապարհ է հարթում դեպի Կասպից ծով, Հայաստանի միջով միջանցք փնտրելով Անկարան լուծում է աշխարհաքաղաքական և գաղափարական ընդլայնման խնդիրները։ Sputnik Արմենիա մուլտիմեդիա հարթակում տեսակոնֆերանսի ժամանակ նման կարծիք է հայտնել ռուս արևելագետ, թուրքագետ Վլադիմիր Ավատկովը, գրում է dzen.ru-ն։
Այդ համատեքստում Ավատկովը քննարկել է հայ-թուրքական հարաբերությունների կարգավորման ներկա գործընթացը, որը նա անվանել է բավականին ոչ ստանդարտ։
Ըստ փորձագետի Թուրքիան (Լեռնային Ղարաբաղի շուրջ տեղի ունեցած հայտնի իրադարձություններից հետո) իրեն հաղթող է զգում և փորձում է շահավետ քաղաքական և տնտեսական կապեր ձևավորել տարածաշրջանում, նա ձգտում է փոփոխել Հարավային Կովկասը, և այդ տրամաբանությանն են ենթարկվում նրա քայլերը Երևանի հետ հարաբերություններում։ «Թուրքիային անհրաժեշտ են միջանցքներ, որոնք նրան կտանեն դեպի Կասպից ծով և Կենտրոնական Ասիա, որպեսզի մոտենա Չինաստանին: Իհարկե, բացի այդ, նա նաև ունի իր գաղափարախոսությունները՝ նեոօսմանիզմ, պանթուրքիզմ: Թուրքական պետությունը բավական գաղափարական է, նրան պետք է, որ Հայաստանը լինի անցողիկ տարածք իր և Ադրբեջանի միջև: Թուրքիան շարժվում է դեպի Կասպից ծով, ինչը նշանակում է, որ ՆԱՏՕ-ն է շարժվում դեպի Կասպից ծով»,- ասել է Ավատկովը:
Ընդ որում, ինչպես նշել է արևելագետը, Կենտրոնական Ասիայի հետխորհրդային պետությունների թյուրքական քաղաքակրթության պատմությունը շատ ավելի հին է, քան ժամանակակից Թուրքիայինը։ Թուրքիան՝ թյուրքական աշխարհի ծայրամասը, փորձում է հակառակը պարտադրել։ Ինչքան Թուրքիայից հեռու, այնքան ավելի շատ թյուրքական ավանդույթներն են պահպանվել, նշել է արևելագետը։
Իր հերթին, հայ սոցիոլոգ, ՀՀ ԳԱԱ ակադեմիկոս Գևորգ Պողոսյանը Հայաստանի տարածքով միջանցք տրամադրելու Թուրքիայի պահանջն առաջին հերթին աշխարհաքաղաքական գաղափար է համարել։ Նրա խոսքով, Թուրքիան կարող է Ադրբեջան հասնել Վրաստանի տարածքով, Իրանի տարածքով, բայց նա դա ցանկանում է անել Հայաստանի հարավով։ Հետևաբար, խոսքը ոչ միայն և ոչ այնքան տրանսպորտային հաղորդակցությունների, որքան տարածքների ընդլայնման մասին է։
Հիշեցնենք, որ Հայաստանից դե ֆակտո արտատարածքային միջանցք տրամադրելու և Հայոց ցեղասպանության ճանաչման գործընթացից հրաժարվելու պահանջը Երևանի հետ հարաբերությունները կարգավորելու Անկարայի հիմնական նախապայմաններից են։
Նյութը հրապարակման պատրաստեց Կամո Խաչիկյանը
