Իշխանության փոխարեն ընդդիմությունն է մասնատվում
ՎԵՐԼՈՒԾՈՒԹՅՈՒՆՆԵՐ
2021 թ. խորհրդարանական արտահերթ ընտրություններից հետո խորհրդարանում հայտնված ընդդիմությունը, մանդատները վայր դնելու առաջարկին պատասխանում էր, թե իրենց նպատակներից մեկն էլ իշխող ուժին ջլատելն է, ՔՊ պատգամավորներին ընդդիմության կողմը գրավելն է, անհրաժեշտ պահին իմպիչմենթի համար բավարար ձայներ հավաքելը։
Փոխարենը, տեղի ունեցավ հակառակ գործընթացը, խորհրդարանական ընդդիմությունն ինքը սկսեց տարալուծվել։ Նախ «Պատիվ ունեմ» խմբակցությունը կորուստներ ունեցավ, այժմ էլ՝ «Հայաստան» դաշինքը։ Խմբակցությունն օրերս նիստ էր գումարել, ապա պաշտոնական հաղորդագրություն տարածել, թե վերջին շրջանում պատգամավոր Գեղամ Նազարյանի դիրքորոշումները տարբերվում են խմբակցության քաղաքական ուղեգծից ու առաջնահերթություններից։ «Այս իրավիճակում Գեղամ Նազարյանի հետագա գործունեությունը խմբակցության կազմում դառնում է անհնար: Խմբակցության նիստում տեղի ունեցած քննարկման արդյունքում պատգամավորին առաջարկել ենք դուրս գալ խմբակցությունից, վերջինիս որոշմանը թողնելով որպես անկախ պատգամավոր գործելու ընտրությունը։ Նա համաձայնել է։ Բաժանվում ենք խաղաղությամբ, միմյանց հանդեպ քաղաքական կոռեկտությունը պահելու պատասխանատվությամբ»,- ասվում է հայտարարության մեջ։
Մի կողմ թողնենք այն, որ քաղաքական պարկեշտությունը վերը նշված անձից պահանջում է վայր դնել մանդատը, քանի որ այն ստացել է բացառապես դաշինքի շնորհիվ և Փաշինյանի հեռացնելու խոստման համար։ Ի վերջո, Գեղամ Նազարյանը ոչ առաջինն է, ոչ վերջինը, որ քաղաքական անպարկեշտության դրսևորումներ է ցուցաբերում։ Խնդիրը «Հայաստան» խմբակցության մեջ է, որն այսպես հաշտ ու համերաշխ պատգամավորին բաց թողնելով՝ հաջորդների համար հարմար ճանապարհ է բացում։ Կամ էլ, իրենց ուզածն էլ դա է։
Էլինա Մակարյան
