Ընդդիմությունը «կրակն է ընկել» իր պատգամավորի ձեռքը

Մինչ Նիկոլ Փաշինյան անձամբ է բարձրաձայնում ՔՊ-ական Հովիկ Աղազարյանի՝ մանդատից հրաժարվելու անհրաժեշտության մասին, խորհրդարանական ընդդիմությունն էլ «կրակն է ընկել» իր պատգամավորի՝ Գեղամ Նազարյանի ձեռքը։ Նազարյանի նկատմամբ «Հայաստան» խմբակցությունում վաղուց կասկածներ են առաջացել, որ համագործակցում է «Քաղպայմանագրի» հետ։ Օրեր առաջ էլ նա ԱԺ նախագահի հետ Վիետնամ էր մեկնել։ Համացանցում տարածված լուսանկարից և վերջին հարցազրույցում հնչեցրած խոսքերից հետո «Հայաստան» խմբակցությունում որոշել են քննարկել նրա հարցը։

Նազարյանն օրերս հայտարարել էր, թե Փաշինյանին հեռացնելու օրակարգ չկա։ «Ի՞նչ ա նշանակում՝ էկել ենք խորհրդարան, որ հեռացնենք: Այսինքն՝ խորհրդարանում ինչ-որ սամբոյի պրիոմ պտի անեինք՝ Նիկոլ Փաշինյանին հեռացնեի՞նք: Պտի իմպիչմենտ անեք, իմպիչմենտի ժամանակ էլ մեծամասնությունը պտի անցնի քո կողմը: Դրա համար պետք ա աշխատանք տանել՝ իրանց համոզես, որ իրանք սխալ են էղել և պիտի անցնեն քո կողմը»,- ասել էր պատգամավորը:

«Հայաստան» խմբակցությունից Ագնես Խամոյանն էր հայտարարել, թե Գեղամ Նազարյանի վերջին հայտարարությունն իր անձնական ընկալումներն են, որը, բնականաբար չի արտահայտում «Հայաստան» խմբակցության տեսակետը։ «Խմբակցությունը Գեղամ Նազարյանին մանդատը վայր դնելու «խնդրանքով» չի կարող դիմել, բայցև ակնհայտ է, որ քննարկվելու է խմբակցությունում պարոն Նազարյանի հետագա գործունեության հարցը», - գրել էր Խամոյանը:

Երեկ նաև Ռոբերտ Քոչարյանն է միացել «խրախճանքին», նշել, որ մոտակա օրերին քննարկելու են Գեղամ Նազարյանի վարքագծի հարցը։ «Ընդհանրապես մանդատը թողնելու քննարկում չի եղել, բայց երբ ֆրակցիայից մեկը կարծիքներ է ասում, որոնք ֆրակցիայի մոտեցմանը հակառակ են, պետք է քննարկման առարկա դառնա։ Եթե համաձայն չէ, փոխել է կարծիքը, ապա ինքն ի վիճակի է նաև լքել ֆրակցիան։ Մանդատից հրաժարումը տվյալ դեպքում պատգամավորի բարոյական մոտեցման հարցն է։ Մենք մոտակա օրերը քննարկելու ենք այդ հարցը»,- լրագրողների հետ զրույցում նշել է Ռոբերտ Քոչարյանը։

Ընդդիմությունն, իհարկե, Նազարյանին չի կարողանա հեռացնել, առավելագույնը, ստիպի, որ դառնա անկախ պատգամավոր։ ԱԺ-ում նույնիսկ կատակում են, թե «տրանսֆերային պատուհան» է բացվել, Աղազարյանին կարող են փոխանակել Նազարյանի հետ։ 

Սերինե Մկրտչյան