Նոր մանրամասներ Սերոբ Գասպարյանի կալանքի գործով

Արցախյան պատերազմների մասնակից, հերոս Ռուստամ Գասպարյանի եղբայր Սերոբ Գասպարյանի կալանքը դատարանը երկարացրել է ևս մեկ ամսով։ Այս մասին «Հրապարակի» հետ զրույցում ասաց Գասպարյանի փաստաբաններից Էրիկ Ալեքսանյանը։

«Դատարանը մեկ ամսով թեև երկարացրել է կալանքը, բայց արձանագրել է, որ հիմնավոր կասկածը նվազել է, քննիչը չի ներկայացրել այնպիսի նոր փաստական տվյալներ, տեղեկություններ, որոնք կամրապնդեին հիմնավոր կասկածը։ Եվ միևնույն ժամանակ դատարանը  ֆիքսել է, որ հետագայում եթե հիմնավոր կասկածը ամրապնդող նոր, լրացուցիչ տեղեկություններ չներկայացվեն, ապա արդեն իսկ հիմնավոր կասկածի նվազած պայմաններում առկա փաստական տվյալները բավարար չեն լինելու հիմնավոր կասկածի շարունակական գոյության մասին վկայելու վերաբերյալ»,-ասաց Ալեքսանյանը։

Դա նշանակում է, որ եթե մեղադրանքը հաստատող նոր փաստեր չներկայացնի քննիչը առաջիկայում, ապա կալանքը չի երկարացվի։ 

Հարցին, արդյոք առերեսում ի վերջո կազմակերպվե՞ց, Գասպարյանի պաշտպանն ասաց, որ այդպես էլ առերեսում չկազմակերպվեց, նաև Ռուսաստանի Դաշնությունից իրենց հարցմանը որևէ պատասխան չի եկել։
Սակայն, գործով կան հետաքրքիր նորություններ։ «Նոր փաստական տվյալներ կան, որոնք հիմնավոր կասկածը նվազեցնում են։ Չեմ կարող բացահայտել, թե ինչ նոր փաստական տվյալների մասին է խոսքը գնում, բայց կան նոր ցուցմունքներ, որոնք հերքում են, որ Սերոբ Գասպարյանը որևէ կերպ  իշխանությունը զավթելու նպատակ է ունեցել և դրա նախապատրաստությունն է արել»,-ասաց Ալեքսանյանը։

Նա նշեց, որ նոր ցուցմունք տվողները գործով անցնող նոր մարդիկ են, որոնց վերաբերյալ ու նրանց տված ցուցմունքների մասով ոչինչ չի կարող ասել։ Այս նոր փաստական տվյալները հերքում են հիմնավոր կասկածը և դատարանը հենց այդպես էլ արձանագրել է, որ դրանք նվազեցնում են հիմնավոր կասկածը։
«Հետագայում, եթե քննիչը նոր փաստական տվյալների հակադրում չներկայացնի, ապա այլևս դա բավարար չի լինելու»,-ասաց Ալեքսանյանը։

Հիշեցնենք, որ Սերոբ Գասպարյանի գործը քննվում է Աջափնյակի դատարանում, դատավորն է Ռազմիկ Մարիկյանը։
Սերոբ Գասպարյանին կալանավորել էին իշխանության յուրացման նախապատրաստության մեղադրանքով։ Իբր հայերի մի խմբի տարել են Ռուսաստան՝ զորավարժությունների, որ հետո սրանք գան եւ զենքով իշխանություն զավթեն։ Գործը կառուցված է մի քանի խոպանչու, այդ թվում՝ առողջական խնդիրներ ունեցող մարդկանց ցուցմունքների վրա, որոնց հետ քննիչը համառորեն առերեսում չի կազմակերպում։