«Աշխարհաքաղաքական փակուղի Անդրկովկասում». քաղաքագետը բացատրել է, թե Արևմուտքն ինչու է Հայաստանին մղում դեպի «ազգային ինքնասպանություն»

Քաղաքագետ, Մերձավոր Արևելքի և Կովկասի հարցերով փորձագետ Ստանիսլավ Տարասովը «Կոմսոմոլսկայա պրավդա»-ի եթերում մեկնաբանել է ՌԴ Արտաքին հետախուզության ծառայության մամուլի բյուրոյի հաղորդագրությունն այն մասին, որ ԱՄՆ Պետդեպարտամենտն ակտիվացրել է աշխատանքը Հայաստանի դեպի Արևմուտք վերակողմնորոշման գործընթացն արագացնելու համար և համառորեն երկիրը մղում է դեպի «ազգային ինքնասպանություն», գրում է radiokp.ru–ն:

Տարասովի խոսքով, Հայաստանն Անդրկովկասում աշխարհաքաղաքական փակուղի է: «Վրաստանը տարանցիկ միջանկյալ երկիր է։ Իմաստ կա պայքարել Վրաստանի համար, քանի որ Ադրբեջանի ողջ էներգետիկ և այլ հաղորդակցությունները դեպի Թուրքիա անցնում են այդ երկրով, և դա շատ կարևոր է, քանի որ շրջափակելով Վրաստանը, կարելի է, ընդհանուր առմամբ, ստիպել Ադրբեջանին ընդունել անհրաժեշտ խաղի կանոնները։ Բայց Հայաստանը փակուղի է: Այն կարող է միացված լինել Հյուսիս-Հարավ տրանսպորտային հաղորդակցություններին կամ միացած չլինել: Նա անընդհատ վաճառքի է հանում իր Զանգեզուրի միջանցքը, բայց հիմա Ադրբեջանը հայտարարել է, որ այդ, այսպես կոչված, Զանգեզուրի միջանցքն անցնելու է Իրանի տարածքով։ Իսկ ո՞ւմ է պետք այդ միջանցքը, չնայած Ռուսաստանը դեռևս առաջ է մղում Ադրբեջանի տարածքով դեպի Թուրքիա և այլն հաղորդակցությունների կրճատման հարցը »,- ասել է նա։

Փորձագետը նշել է, որ Հայաստանի ղեկավարությունը, դեռևս Նիկոլ Փաշինյանից առաջ էր վարում արևմտամետ քաղաքականություն: «Հիմա պետք է բացահայտ խոսել այդ մասին, Փաշինյանի հայտնվելը քաղաքական ասպարեզում պատահականություն չէր: Բայց փաստ է այն, որ Արևմուտքը, բացի հայտարարություններից, քարոզչությունից, ինչ-որ հնարքներ կիրառելուց բացի չի կարող այլընտրանքային տնտեսական լուծումներ տալ։

Ապրանքաշրջանառությունը, որ տեղի է ունենում Հայաստանի և ԵԱՏՄ-ի միջև, էլ չխոսենք մեր երկրների երկկողմ հարաբերությունների մասին, արդեն միլիարդավոր դոլարների է հասնում։ Ո՞ր Բրյուսելը, ո՞ր Փարիզը և ո՞ր Վաշինգտոնն է պատրաստ ներկա պայմաններում փոխարինել այդ իրավիճակին։ Անգամ որոշ ազատ սակագների շուրջ բանակցությունները, որոնք Հայաստանը փորձում էր վարել, տապալվեցին։ Խոսքը ինչ-որ խղճուկ սուբսիդիաների մասին էր՝ բացարձակապես անհեռանկարային։ Պարզապես արևմտյան դիվանագիտությունը ցույց է տալիս ամերիկյան քաղաքականության դեգրադացումը որպես ամբողջություն»,- եզրափակել է փորձագետը։

Նյութը հրապարակման պատրաստեց Կամո Խաչիկյանը

www.1or.am