Պետդումայում խոսել են Դոմոդեդովոյում բռնված ուկրաինական զինված ուժերի հայաստանցի վարձկանի մասին
ՔԱՂԱՔԱԿԱՆՈՒԹՅՈՒՆ
«Դոմոդեդովո» օդանավակայանում բռնված հայաստանցի ուկրաինական զինված ուժերի վարձկանը պետք է դատվի ռուսական օրենքներով, ասել է Պետդումայի միջազգային հարաբերությունների հանձնաժողովի փոխնախագահ Ալեքսեյ Չեպան։ News.ru-ի հետ զրույցում պատգամավորը նաև նշել է, որ այս իրավիճակը ոչ մի կերպ չի նշանակում Հայաստանի աջակցություն Ուկրաինային։
«Կարծում եմ, որ ոչ մի դեպքում չի կարելի ասել, որ Հայաստանը նման կերպ աջակցում է Ուկրաինային, քանի որ սրանք անհատ վարձկաններ են և կարող են լինել տարբեր երկրներից։ Պատիժը կարող է լինել մեր օրենքներին համապատասխան, բայց դա կապ չունի ռուս-հայկական հարաբերությունների հետ»,- պարզաբանել է Չեպան։
Պատգամավորն ընդգծել է, որ վարձկանների ժամանումները շատ դեպքերում համաձայնեցված չեն լինում իրենց հայրենի երկրների համապատասխան ծառայությունների հետ։ Խորհրդարանականի խոսքով նման իրավիճակներում պետք է մարդուն վերաբերվել որպես հանցագործի, եթե նա որոշակի գործողություններ է կատարել Ռուսաստանի դեմ։ «Շատ դեպքերում սրանք այդ երկրների հատուկ ծառայությունների հետ չհամակարգված ժամանումներ են: Սրանք առանձնահատուկ դեպքեր են, և մենք պետք է այդ անձին վերաբերվենք որպես հանցագործի, ով որոշակի գործողություններ է կատարել Ռուսաստանի դեմ, եթե, իհարկե, կատարել է»,- հավելել է Չեպան։
Հիշեցնենք, որ ավելի վաղ իրավապահները «Դոմոդեդովո» օդանավակայանում բերման էին ենթարկել Հայաստանի քաղաքացի Արմեն Բալյանին, ով Ուկրաինայի կողմից որպես վարձկան մասնակցել էր ռազմական գործողություններին։ Օտարերկրացուն բռնել են այն ժամանակ, երբ նա փորձում էր մտնել Ռուսաստանի տարածք:
Նյութը հրապարակման պատրաստեց Կամո Խաչիկյանը
