«Ալիևը վշտեցրել է Փաշինյանին. դժվար ընտրություն և արտահերթ ընտրություններ»
ՔԱՂԱՔԱԿԱՆՈՒԹՅՈՒՆ
Ադրբեջանը հավատարիմ է Հայաստանի հետ երկարաժամկետ խաղաղության հասնելուն և չի ցանկանում, որ համաձայնագիրն ընկալվի որպես բացառապես վարչապետ Նիկոլ Փաշինյանի հետ ստորագրված։ Այդ մասին հայտարարել է Ադրբեջանի նախագահ Իլհամ Ալիևի հատուկ հանձնարարությունների գծով ներկայացուցիչ Էլչին Ամիրբեկովը գերմանական Berliner Zeitung թերթին տրված հարցազրույցում, գրում է eadaily.com-ը։ Ավելին, Ադրբեջանն ակտիվացրել է իր տեղեկատվական արշավը Հայաստանը ներկայացնելով որպես խաղաղության գործընթացի «արգելակող»։ Բաքվի այս բոլոր գործողություններից կարելի է զգալ, որ նրանք փորձում են Երևանի վրա գցել ամենակարճ ժամանակում խաղաղության հասնելու սեփական չցանկանալը։
Այսինքն Ալիևը հստակ ազդակ է ուղարկում Փաշինյանին, որ չպետք է հույս դնել մինչև 2026 թվականին Հայաստանում կայանալիք խորհրդարանական ընտրություններից առաջ խաղաղության ստորագրման վրա։ Այսինքն Հայաստանի ղեկավարը պետք է մնա իշխանության ղեկին, որպեսզի Ադրբեջանը ստանա որոշակի հաստատում, որ հաշտություն է կնքում «ոչ թե Նիկոլ Փաշինյանի, այլ Հայաստանի հետ»։ Այսպիսով, խաղաղության հեռանկարը կարող է հետաձգվել մինչև 2027 թվականը։
Փաշինյանը կարող է արագացնել գործընթացը որոշելով արտահերթ ընտրություններ անցկացնել, սակայն իրադարձությունների զարգացման նման սցենարին դժվար է հավատալ։ Հայաստանի վարչապետը ներկայումս չունի ազդեցիկ փաստարկներ և ներքաղաքական անմիջական պատճառներ «նախահարձակման» համար: Ընդդիմությունն առիթը բաց չի թողնի դա որակել որպես Ալիևի թելադրանքով ընդունված հերթական «պարտվողական» որոշում։ Բացի այդ, արտահերթ ընտրությունների ուղղությամբ Փաշինյանի ցանկացած քայլ մեծ ներքաղաքական ռիսկեր է պարունակում իշխող «Քաղաքացիական պայմանագիր» կուսակցության համար։ Վարչապետի քաղաքական ասոցիացիայի և անձամբ կառավարության ղեկավարի ներկայիս վարկանիշը, ըստ վերջին հարցումների, չի գերազանցում 15 %-ը։ Մյուս քաղաքական ուժերը ևս մեծ վստահություն չեն վայելում քաղաքացիների շրջանում, սակայն ընդդիմությունը, արտահերթ ընտրությունների քարոզարշավի դեպքում, լուրջ հնարավորություններ կունենա շրջել իրավիճակը և ընտրողներից ավելի մեծ աջակցություն ստանալ, քան ունի ներկայումս Ազգային ժողովում։
Արտահերթ ընտրությունների դեպքում Փաշինյանը պարզապես վտանգում է ստանալ վատ ներքաղաքական կոնֆիգուրացիա, ընդհուպ մինչև կոալիցիոն կառավարություն ստեղծելու անհրաժեշտությունը, կամ էլ, ինչ ավելի վատ է, անվերջանալի ընտրությունների շարանի մեջ ընկնելը:
Նյութը հրապարակման պատրաստեց Կամո Խաչիկյանը
