Հայաստանը եկել էր իր գինիները գովազդելու VitiVini-ում
ՀԱՍԱՐԱԿՈՒԹՅՈՒՆ
VitiVini 2024-ի ավելի քան 200 ցուցադրողների թվում առանձնանում էր մեկ տաղավար: Փարիզի և Երևանի համագործակցության նպատակով հայ գինեգործներ էին հրավիրվել ներկայացնելու իրենց արտադրանքը, գրում է lunion.fr-ն։
Կանոնից բացառություն պետք է լինի: VitiVini (2024 թ. հոկտեմբերի 15-18) ցուցահանդեսը, որը նվիրված էր պրոֆեսիոնալ գինեգործության մասնագետներին, ավարտվել է հիշողություններ թողնելով Հայաստանի մասին։ Հնարավոր է եղել բացահայտել, որ Թուրքիայի և Իրանի միջև խրված նախկին խորհրդային մի հանրապետություն աշխարհի հնագույն գինի արտադրողներից է: «Արդեն 6500 տարի»,- հիշեցրել է Հայաստանի պատվիրակության անդամ Անուշ Հովնանյանը։ Եվ դա այդ երկիրը դարձնում է գինու օրրան: «Ավանդույթը գալիս է Նոյան տապանից, երբ հայրապետն Արարատ լեռան վրա խաղողի այգի տնկեց։ Հնագիտական պեղումներով հայտնաբերվել են այդ ժամանակաշրջանի ամֆորաներ։ Դրանք օգտագործվում էին գինիներ պահելու համար»,- շարունակել է նա։ Փոքր Կովկասի այդ երկրում պաշտոնապես կա 357 խաղողի տեսակ։ Կամ գուցե ավելին... Մոտ տասնհինգ արտադրողների ընտրանին էր ցուցահանդեսում: «Հայաստանում մենք արտադրում ենք հանգիստ գինիներ, ինչպես նաև որոշ փրփրուն գինիներ»,- պատմել է Անուշ Հովնանյանը։
«VitiVini»-ի 13-րդ ցուցահանդեսում Հայաստանի ներկայությունը մենք պարտական ենք Ֆրանսիայի և այդ երկրի միջև 2021 թվականին ստորագրված համաձայնագրին։ Այդ հանաձայնագրով ստեղծվել է «Ճանապարհային քարտեզ 2021-2026» տարօրինակ անունով հանձնաժողով, որն աշխատում է երկու երկրների միջև համագործակցության զարգացման համար, օրինակ կայուն զարգացում, կրթություն, Ֆրանկոֆոնիա և տնտեսություն, գինին ևս իր տեղն է գտել այնտեղ:
«Մենք փոխել ենք մեր գործելակերպը և ստեղծել ընդհանուր հետազոտական ծրագիր, - բացատրել է «Ճանապարհային քարտեզ 2021-2026»-ի կոմիտեի գլխավոր պատվիրակ Սերժ Խևասյանը,- մենք պետք է ուսումնասիրենք բիոխաղողագործությունը: Ֆրանսիացիները Հայաստանում հաստատվել են գինի արտադրելու նպատակով։ Ֆրանսիայի հետ համագործակցությունը բնական է: Ընդ որում հիմա մենք այստեղից էլ գնում ենք մեր տակառները, քանի որ Ղարաբաղից արդեն չենք կարող դրանք ձեռք բերել»: Բանն այն է, որ այդ տարածքն Ադրբեջանը հիմա անեքսիայի է ենթարկել:
Տեղեկատվության համար: Հայաստանը վերջին շուրջ երեսուն տարում վերականգնում է իր գինու ավանդույթը և տարեկան արտադրում է 12 միլիոն լիտր գինի։ Խորհրդային տարիներին արտադրությունը կենտրոնացած էր կոնյակի վրա։ Այդպես էր որոշում Մոսկվան իր հնգամյա ծրագրերում։ «Մեզ համար դա կոնյակ էր։ Գինին Վրաստանն էր, իսկ Ուկրաինայինը ցորենը։ Ամեն ինչ որոշված էր։ Ամեն ինչ ծրագրված էր,- ամփոփել է Սերժ Խևասյանը,- բայց այն պահից երբ մենք անկախ դարձանք, հայկական գինին հաճախ է դասվում աշխարհի լավագույն գինիների 10 կամ 15-ակում»:
Նյութը հրապարակման պատրաստեց Կամո Խաչիկյանը
