Հայաստանը շարունակում է ռուսական ներդրումների կարիքը ունենալ
ՔԱՂԱՔԱԿԱՆՈՒԹՅՈՒՆ
Քաղաքագետ, «Accents» վերլուծական կենտրոնի ղեկավար, փորձագետ Անտոն Չաբլինը խոսել է ԱՊՀ գագաթնաժողովի շրջանակներում Վլադիմիր Պուտինի և Նիկոլ Փաշինյանի քննարկած որոշ թեմաների մասին, գրում է Choice-naroda.org-ը։
Ըստ նրա հանդիպման առանցքային հարցերից է եղել Իրանի և Թուրքիայի հետ Հայաստանի սահմանի վերահսկողությունը հայ սահմանապահներին փոխանցելու հարցը։ Հիշեցնենք, որ կողմերը պայմանավորվել են, որ 2025 թվականի հունվարի 1-ից հայկական սահմանապահ զորքերը կմասնակցեն սահմանների պաշտպանությանը, իսկ Իրանի հետ սահմանի անցակետում ծառայությունն ամբողջությամբ կիրականացվի հայկական ուժերի կողմից։ Նաև հիշենք, որ հուլիսի 31-ից ռուս սահմանապահներն են պաշտոնապես լքել Երևանի «Զվարթնոց» օդանավակայանի անցակետը։
Այդ ամենը կարող է հեռահար հետևանքներ ունենալ ռուս-հայկական հարաբերությունների վրա։ Մի կողմից սահմանի նկատմամբ վերահսկողության փոխանցումը վկայում է Հայաստանի անկախության ամրապնդման մասին։ Դա նշանակում է, որ Երևանը ստանձնում է իր սահմանները պաշտպանելու ողջ պատասխանատվությունը առանց դրսի օգնության վրա հույս դնելու։ Դա կարևոր քայլ է երկրի ինքնիշխանության ամրապնդման ուղղությամբ։ Մյուս կողմից, այդ քայլը կարող է դիտվել նաև որպես Հայաստանում Ռուսաստանի դերի փոփոխություն։ Ռուսաստանը Հայաստանի անվտանգության գլխավոր երաշխավորն է 1991 թվականի անկախացումից ի վեր։ Սակայն վերջին տարիներին Հայաստանը քայլեր է ձեռնարկում իր անվտանգության հարաբերությունները դիվերսիֆիկացնելու ուղղությամբ։ Դա ներառում է հարաբերությունների ամրապնդում այլ այնպիսի երկրների հետ, ինչպիսիք են ԱՄՆ-ը, Ֆրանսիան և նույնիսկ Հնդկաստանը: Սահմանի վերահսկողության փոխանցումը այդ միտման մի մասն է:
Այնուամենայնիվ Ռուսաստանը մնում է Հայաստանի առաջատար տնտեսական գործընկերը և երկրում մի շարք խոշոր ենթակառուցվածքային ծրագրեր է իրականացնում։ Դժվար թե սահմանային վերահսկողության փոխանցման արդյունքում երկու երկրների տնտեսական հարաբերությունները էապես փոխվեն։ Ռուսաստանը կշարունակի շահագրգռված լինել Հայաստանի հետ ամուր տնտեսական կապերի պահպանմամբ, իսկ Հայաստանը կշարունակի ունենալ ռուսական ներդրումների և նրա հետ առևտրի կարիքը:
Նյութը հրապարակման պատրաստեց Կամո Խաչիկյանը
