Հնդկաստանը հավանություն է տվել Հայաստանին Pralay քվազիբալիստիկ հրթիռների մատակարարմանը
ՀԱՍԱՐԱԿՈՒԹՅՈՒՆ
Հնդկաստանի պաշտպանության նախարարությունը պաշտոնական թույլտվություն է տվել Հայաստան արտահանելու Pralay քվազիբալիստիկ հրթիռներ։ Ինչպես նշում է հնդկական Alpha Defense պորտալը, այդ որոշումը բարեկամ երկրի հետ գործարք կնքելու առաջին քայլն է։ Թեև Հայաստանի պաշտպանության նախարարությունից պաշտոնական հաստատում դեռևս չի ստացվել, սակայն անուղղակի ապացույցները վկայում են այդ հրթիռները մատակարարելու Հնդկաստանի պատրաստակամության մասին, գրում է avia.pro-ն։
Իրավիճակին ծանոթ աղբյուրների փոխանցմամբ մոտ ապագայում կարող է կնքվել Հայաստանին Pralay հրթիռների մատակարարման գործարքը։ Նման հրթիռներ վաճառելու պլանների մասին ավելի վաղ հայտնել էր Indian Defense Research Wing հրատարակությունը, որը պնդել էր, որ Հնդկաստանն արդեն բանակցություններ է սկսել մատակարարումների վերաբերյալ և պատրաստվում է վերջնական տեսքի բերել պայմանագիրը: Սակայն այդ հրթիռների տեղափոխումը Հայաստան զերծ չէ որոշակի իրավական ու տեխնոլոգիական սահմանափակումներից։ Հնդկաստանը պարտավորվել է չարտահանել ավելի քան 300 կիլոմետր հեռահարությամբ և 500 կիլոգրամից ավելի կշռող մարտագլխիկներով հրթիռներ, դա սահմանված է սպառազինությունների արտահանման վերահսկման միջազգային համաձայնագրերով։ Այս առումով, ըստ Alpha Defense կայքի, Հնդկաստանը ակտիվորեն աշխատում է ադապտացնել Pralay հրթիռները կրճատված հեռահարության և մարտագլխիկի քաշին, որպեսզի կատարեն այդ պարտավորությունները:
Pralay հրթիռը քվազիբալիստիկ է, այն արդյունավետորեն խոցում է ինչպես անշարժ, այնպես էլ շարժվող թիրախները: Նրա հիմնական առավելությունը մեծ արագությունն է և հակառակորդի հակաօդային պաշտպանության համակարգերը շրջանցելու ունակությունը, ինչը նրան չափազանց օգտակար է դարձնում ժամանակակից մարտավարության մեջ։
Նյութը հրապարակման պատրաստեց Կամո Խաչիկյանը
