Ժնևում զարգացումները ՀՀ օգտին չեն

Շաբաթներ շարունակ գործող իշխանությունները տարփողում էին, որ Ժնևում ընթացող Միջխորհրդարանական միության 149-րդ վեհաժողովի շրջանակներում կայանալու է Հայաստանի Ազգային ժողովի նախագահ Ալեն Սիմոնյանի և Ադրբեջանի Միլլի մեջլիսի նախագահ Սահիբա Գաֆարովայի հանդիպումը։ Կառույցի խոսնակ Թոմաս Ֆիցսիմոնն ասել էր, որ Սիմոնյանն ու Գաֆարովան կքննարկեն տարածաշրջանում խաղաղությանն ուղղված ջանքերը։ Վերջին պահին հանդիպումը չեղարկվել է, ադրբեջանական կողմը հրաժարվել է նախապես ձեռքբերված պայմանավորվածությունից։ Գաֆարովան, փոխարենը, այլ հանդիպումներ էր ունեցել, այդ թվում՝ Թուրքիայի Ազգային մեծ ժողովի նախագահ Նուման Քուրթուլմուշի հետ, քննարկել էին այսպես կոչված «Զանգեզուրի միջանցքի» հարցերը։

Քուրթուլմուշը դրանից հետո հանդիպում էր ունեցել Ալեն Սիմոնյանի հետ։ X-ի իր էջում Հայաստանի Ազգային ժողովի նախագահը գրել է, թե քննարկել է Հարավային Կովկասում ու տարածաշրջանում խաղաղության գործընթացին վերաբերող հարցեր։ Նա նաև տեղեկացրել է, որ Քուրթուլմուշին է ներկայացրել Հայաստանի կառավարության «Խաղաղության խաչմերուկ» նախագիծը, քննարկել են երկկողմ հետաքրքրություն ներկայացնող հարցեր, ինչպես նաև պայմանավորվել են հետագայում շարունակել իրենց շփումները։ Ադրբեջանի վարքը հասկանալի է, այդ երկիրը մերժում է ՀՀ առաջարկած խաղաղության ծրագրերը, ակտիվորեն պատրաստվում պատերազմի։ Ադրբեջանի նախագահ Իլհամ Ալիևը երեկ վերստին հայտարարել է՝ Հայաստանի տարածքում ԵՄ-ի դիտորդական առաքելության գործունեությունն անընդունելի է և անվստահություն է առաջացնում Բաքվի և Բրյուսելի միջև հարաբերություններում։

Ադրբեջանի առաջնորդը եվրոպացի դիտորդների գործունեությունն անվանել է «հեռադիտակային դիվանագիտություն»։ «Ո՞րն էր առաքելության ժամկետը երկարաձգելու, նրանց թվաքանակն ավելացնելու անհրաժեշտությունն՝ այն էլ առանց Բաքվի հետ խորհրդակցելու», - Բաքվում ընդունելով Բելգիայի նորանշակ դեսպան Ժյուլիեն դե Ֆրեպոնի հավատարմագրերը՝ հայտարարել է Ալիևը, միևնույն ժամանակ հայկական կողմին մեղադրելով «բրյուսելյան հարթակից» փախչելու մեջ։ Բաքուն բոլոր միջոցներով միջազգային հանրության մոտ տպավորություն է ստեղծում, թե հայկական կողմն ապակառուցողական է տրամադրված՝ հարձակման լեգիտիմ հիմքեր ստեղծելու նպատակով, իսկ Հայաստանի գործող իշխանությունները, հերքելու, Ադրբեջանի վարքը միջազգային հանրությանը նեկայացնելու փոխարեն, ընդհակառակը, նպաստում են նոր ռազմական էսկալացիային։

Ալիտա Ամիրյան