Ռուս սահմանապահները լքում են Հայաստան-Իրան սահմանի անցակետը
ՔԱՂԱՔԱԿԱՆՈՒԹՅՈՒՆ
Մոսկվայում ԱՊՀ երկրների ղեկավարների գագաթնաժողովում ՌԴ նախագահ Վլադիմիր Պուտինի և Հայաստանի վարչապետ Նիկոլ Փաշինյանի երկկողմ բանակցությունների ընթացքում պայմանավորվածություն է ձեռք բերվել, ըստ որի 2025 թվականի հունվարի 1-ից հայ սահմանապահները ռուսների հետ համատեղ կպահպանեն Իրանի և Թուրքիայի հետ սահմանները։ Միաժամանակ ռուս սահմանապահներն ամբողջությամբ դուրս են բերվելու հայ-իրանական միակ սահմանային անցակետից, նրանց փոխարինելու են հայ գործընկերները։ Պաշտոնական Երևանը միաժամանակ պարզաբանել է, որ ռուս սահմանապահները սեփական նախաձեռնությամբ են լքում անցակետը։ Ի՞նչ է կանգնած նման սահմանային տեղաշարժի հետևում հաշվի առնելով այն, որ այդ անցակետը գտնվում է Հյուսիս-Հարավ միջանցքի ճյուղերից մեկում։ Հարցին անդրադարձել է iarex.ru լրատվական գործակալության սյունակագիր Ստանիսլավ Տարասովը։
«Հիշեցնեմ, որ սահմանային անվտանգության ապահովման գործում ներգրավված կարևորագույն կառույցներից մեկը Հայաստանում Ռուսաստանի Դաշնության Անվտանգության դաշնային ծառայության սահմանային ծառայությունն է։ Այն բաղկացած է չորս սահմանապահ ջոկատներից, որոնք տեղակայված են Արտաշատ, Գյումրի, Մեղրի և Արմավիր քաղաքներում։ Այն բանից հետո, երբ ՀՀ վարչապետը ներկայացրեց «Աշխարհի խաչմերուկ» ծրագիրը, որն առաջարկեց որպես այլընտրանք Զանգեզուրի տրանսպորտային միջանցքին, Երևանից հայտարարություններ հնչեցին, որ այդ հաղորդակցությունը գործելու է առանց Ռուսաստանի մասնակցության։ Որոշ փորձագետներ դա կապում են Իրանի դիրքորոշման հետ, որը որոշակի կասկածանքով է վերաբերվում Զանգեզուրի միջանցքի բացման հարցում Ռուսաստանի դիրքորոշմանը պատճառաբանելով, որ այդ միջանցքը կարող է փակել իր «Հայաստանով անցնող եվրոպական դարպասը»։ Ուստի, թվում է, թե Մոսկվան այս կերպ որոշել է հեռացնել Թեհրանին նյարդայնացնող գործոնը և հետ քաշել իր սահմանապահներին անցակետից»,- կարծիք է հայտնել փորձագետը։
Միևնույն ժամանակ, Ստանիսլավ Տարասովը, նշելով այն պատճառները, թե ինչու Ռուսաստանը որոշեց հետ քաշել իր սահմանապահներին Իրանի հետ Հայաստանի սահմանի անցակետից, ընդգծել է Մոսկվայի ցանկությունը զիջումների գնալ Թեհրանին, որին թվում է թե առկա է «Զանգեզուրի հարցում Ռուսաստանի կողմից Հայաստանի վրա ճնշում գործադրել»։
Նյութը հրապարակման պատրաստեց Կամո Խաչիկյանը
