Փաշինյանը կգնա Էջմիածին, իսկ եկեղեցին երե՞ս է թեքում Բագրատ Սրբազանից

Մյուռոնօրհնեքի և Մայր տաճարի վերաօծման արարողությունները և դրանց շուրջ զարգացումները կրկին սրել են հանրային դժգոհությունները։ Երեկվա դրությամբ, հայտնի էր, որ նախագահ Վահագն Խաչատուրյանն ու ԱԺ նախագահ Ալեն Սիմոնյանը մասնակցելու են արարողություններին։ Մեծ հավանականությամբ, Էջմիածին կգնա նաև Նիկոլ Փաշինյանը։

Հանրության ընդդիմադիր հատվածը կարծում է, թե ՀԱԵ ղեկավարությունն այդ հրավերով լուրջ հարված է հասցնում իր հեղինակությանը։ Ընդդիմադիր շարժումն օրհնած կաթողիկոսի և Փաշինյանի հարաբերությունները վաղուց են սրված, և այժմ, թերևս, դրանք կարգավորվելու ճանապարհին են։ Փաշինյանին էլ ձեռնտու է գնալ Էջմիածին՝ տպավորություն ստեղծելու, թե լուծել է եկեղեցու հետ իր հարցերը։

Տարօրինակ չէ, որ վարչապետի ընտանիքին պատկանող լրատվամիջոցը տեղեկություն է տարածել, թե Մայր Աթոռից Բագրատ արքեպիսկոպոս Գալստանյանին արգելել են մասնակցել Սրբալույս Մյուռոնի օրհնության և Մայր Տաճարի վերաօծման արարողություններին: Գալստանյանն էլ իբր իր բացակայությունն արդարացնելու համար որոշել է գնալ Հայաստանի վանքերից մեկը և մի քանի օր մնալ այնտեղ:

Տեղեկությունն, իհարկե, կեղծիք է մասամբ։ Գալստանյանն իսկապես հայտնել է, թե «Սրբազան պայքարի»՝ հոկտեմբերի 2-ին մեկնարկող «Հաղթանակի և Հույսի» փուլին ընդառաջ մեկնել է Հայաստանի վանքերից մեկը եռօրյա առանձնության, աղոթքի, պահեցողության և ծոմապահության։ Միգուցե, Սրբազանը չի ցանկանում Էջմիածնում տեսնել դավաճան իշխանությունների ներկայացուցիչներին, նրանց հետ մասնակցել արարողություններին։ Ցավոք, ստեղծված իրավիճակը Փաշինյանին ևս մեկ առիթ կտա գլխիվայր շրջելու իրականությունը։ 

Լիլիթ Ազարյան