Ընտանիքի կյանքը խլած հիմնական կասկածյալը հայտնաբերվել է

Այսօր՝ սեպտեմբերի 20-ին, ՀՀ ներքին գործերի նախարարության ոստիկանության Շիրակի մարզային վարչության (վարչության պետ Արթուր Բդոյանի), ոստիկանության Ախուրյանի բաժնի քրեական հետախուզության բաժանմունքի ծառայողները՝ բաժնի պետ Մինո Մխիթարյանի և ՀՀ քննչական կոմիտեի Շիրակի մարզային քննչական վարչության և նույն վարչության Ախուրյանի քննչական բաժնի քննիչները՝ վարչության պետ Աղասի Իսահակյանի, Ախուրյանի քննչական բաժնի պետ Վահան Սամվելյանի գլխավորությամբ մի քանի ամիս շարունակ իրականացրել են հսկայածավալ օպերատիվ-հետախուզական և քննչական միջոցառումներ, ապա վստահ լինելով, թե որտեղ է գտնվում կասկածյալը, բացատրական աշխատանքներ են կատարել, ինչի արդյունքում կասկածյալ, Շիրակի մարզի բնակիչ 41-ամյա Արմեն Տոնոյանը այսօր՝ սեպտեմբերի 20-ին, ինքնակամ ներկայացել է ոստիկանության Ախուրյանի բաժին:  

Ինչպես հայտնում է ֆոտոլրագրող Գագիկ Շամշյանը, վերջինս այս տարվա հուլիսի 30-ից ոստիկանության Ախուրյանի բաժնի կողմից հետախուզվում էր ՀՀ քրեական օրենսգրքի 342 հոդվածի 3-րդ մասի մեղադրանքով և նրա նկատմամբ դատարանը որպես խափանման միջոց ընտրել էր կալանավորումը:
 
Քիչ առաջ Ա. Տոնոյանը ոստիկանության Ախուրյանի բաժնից ներկայացվել է ՀՀ քննչական կոմիտեի Շիրակի մարզային քննչական վարչություն:  

Ֆոտոլրագրողը հայտնում է նաև, որ մինչ համացանցում շատերը քննարկում էին ընտանեկան ողբերգական ավտովթարը, ինչի հետևանքով երիտասարդ ամուսիններն ու նրանց անչափահաս տղան մահացել էին, ու կարծիքներ էին հայտնում, թե ոստիկաններն ու քննիչները անգործության են մատնված և այս դեպքը կարծես թե փակել են, ու ոչ էլ կհայտնաբերեն «ճիվաղին», և նա կմնա անպատիժ, Շիրակի մարզի ոստիկաններն ու քննիչները 24 ժամյա ռեժիմով մարզի ոստիկանության պետի, քննչականի պետի և դատախազի գլխավորությամբ հսկայածավալ աշխատանքներ կատարեցին, ինչը պսակվեց հաջողությամբ ու ստահակը, այլ ելք չունենալով, այսօր ներկայացավ ոստիկաններին:  
Ֆոտոլրագրողի տեղեկություններով՝ նրան տեղափոխելու են ՀՀ արդարադատության նախարարության քրեակատարողական ծռայութան համապատասխան հիմնարկ:  

Ինչպես ավելի վաղ հայտնել էր SHAMSHYAN.com-ը՝ ՀՀ Քննչական կոմիտեի Շիրակի մարզային քննչական վարչությունում նախաձեռնված քրեական վարույթի շրջանակում հետախուզում էր հայտարարվել Շիրակի մարզի բնակիչ 41-ամյա Արմեն Տոնոյանի նկատմամբ։

Վերջինս կասկածվում էր հուլիսի 26-ին Շիրակի մարզում ողբերգական ավտովթարի մասնակցության մեջ, ինչի հետևանքով երիտասարդ ամուսիններն ու նրանց անչափահաս որդին մահացել էին, իսկ ստահակը հասցրել էր, ըստ ոստիկանության Շիրակի մարզային վարչությունում ստացված օպերատիվ տեղեկությունների, հատել Հայաստանի սահմանը՝ փախնելով Վրաստան։