Երևանի ավագանիում որոշել են ազատվել ընդդիմախոսներից

Երևանի ավագանու «Քաղաքացիական պայմանագիր» խմբակցությունն ուզում է վաղաժամկետ դադարեցնել «Ազգային առաջընթաց» խմբակցության ղեկավար Գրիգոր Երիցյանի և «Հանրային ձայն» խմբակցության անդամներ Անուշ Խուդավերդյանի ու Անույշ Գինոսյանի լիազորությունները: Այս մասին տեղեկանում ենք Երևանի քաղաքապետարանի պաշտոնական կայքից։

Նախագծերն ընդգրկված են ավագանու՝ սեպտեմբերի 10-ի հերթական նիստի օրակարգում: Հիմնավորման մեջ նշվում է, որ Իրավական հարցերի մշտական հանձնաժողովի անդամ հանդիսացող Գրիգոր Երցյանը հանձնաժողովի 7 նիստերից միայն մեկին է ներկա եղել, իսկ ավագանու 5-րդ գումարման երկրորդ նստաշրջանի ընթացքում 5 նիստերից դարձյալ միայն մեկին է մասնակցել: Ինչ վերաբերում է «Հանրային ձայն» խմբակցության անդամներին, նրանք բացակայել են ավագանու նիստերի քվեարկություններից կեսից ավելիից:

«Ազգային առաջընթաց» խմբակցությունից պնդում են, թե սա ընդդիմախոսներից ազատվելու և քաղաքական հաշվեհարդարի հերթական փորձն է, որը վտանգավոր նախադեպ է ստեղծում, քանի որ Հայաստանի նորանկախ պատմության մեջ որևէ իշխանություն մանդատից չի զրկել որևէ ընդդիմադիր խմբակցության ղեկավարի։

Ընդդիմությունն, իհարկե, կարող է ասել ցանկացած բան, որի մեծ մասն էլ արդարացված կլինի։ Սակայն նիստերին չներկայանալով իշխող ուժին նման հնարավորություն տալը, մեղմ ասած, դրական չի խոսում ընդդիմադիր խմբակցության մասին։ Բնական է, որ «Քաղպայմանագիրն» ամեն ինչ անելու է, օրենքի ցանկացած սողանցք օգտագործելու է իր իշխանությունն ամրապնդելու համար, արդ ինչո՞ւ նրան տալ այդ հնարավորությունը, հետո էլ բողոքել։

Աննա Սարիբեկյան