Երևանում անցկացվել է վազքարշավ՝ հանուն հաղթանակի և խաղաղության

Սպորտի և երիտասարդության հարցերի նախարարությունը, Հայաստանի եռամարտի ֆեդերացիան և Երևանում Ռուսաստանի գիտության և մշակույթի կենտրոնը Հայաստանի Հանրապետությունում Ռուսաստանի Դաշնության դեսպանատան աջակցությամբ կազմակերպել էին վազքարշավ՝ «Հանուն հաղթանակի և խաղաղության» նշանաբանով:

Նախարարությունից հայտնում են, որ մասնակիցները վազքով անցել են ավելի քան 4 կմ՝ Հաղթանակի զբոսայգու Անհայտ զինվորի հուշարձանի հարակից տարածքից մինչև Հանրապետության հրապարակ:

Նախքան մասսայական վազքի մեկնարկը ՀՀ սպորտի և երիտասարդության հարցերի փոխնախարար Գաբրիել Ղազարյանը և Երևանում Ռուսաստանի գիտության և մշակույթի կենտրոնի տնօրեն Մարկ Կալինինը ծաղկեպսակներ են դրել Անհայտ զինվորի հուշարձանին:

«Մայիսը հաղթանակների ամիս է, իսկ մայիսի 9-ը՝ կրկնակի հաղթանակի օր, քանի որ այդ օրը տոնում ենք Հայրենական մեծ պատերազմի հաղթանակի և Շուշիի ազատագրման տարեդարձները: Այսօր մենք ցանկանում ենք հիմք դնել մի նոր ավանդույթի՝ այն, որ մայիսյան հաղթանակները նշվեն ոչ միայն մշակութային, այլ նաև մարզական միջոցառումներով: Նման մասսայական մարզական միջոցառումները նաև սպորտի քարոզչության նպատակ ունեն, ինչը մեր նախարարության որդեգրած քաղաքականության կարևորագույն ուղղություններից մեկն է»,- ասել է Գ. Ղազարյանը:

Միջոցառմանը մասնակցել է շուրջ 700 մարդ: Եզրագիծը հատած բոլոր մասնակիցներն արժանացել են պատվոգրերի: