Երեխաներին սովորեցնում են ատել ռուսներին. Հայաստանը մեկ քայլ է հեռու նրանից, որ կրկնի Ուկրաինայի ճանապարհը
ՔԱՂԱՔԱԿԱՆՈՒԹՅՈՒՆ
Հայաստանի պատմության 8-րդ դասարանի դասագրքի հեղինակները որոշել են խմբագրել այն հատվածը, որտեղ գրված է, որ իբր 1828 թվականին Ռուսական կայսրությունն «անեքսիայի է ենթարկել» Արևելյան Հայաստանը։ Դա տեղի է ունեցել միայն այն բանից հետո, երբ ՌԴ ԱԳՆ-ն է կոչ արել Երևանին «մատների արանքով չնայել» դասագրքային սադրանքներին և թույլ չտալ նման ուսումնական նյութեր դպրոցներում։ Tsargrad.tv-ի փորձագետները մեկնաբանել են իրավիճակը։
Հայաստանը դարձել է գրեթե վերջին պետությունը հետխորհրդային տարածքում, որը սկսել է դպրոցական դասագրքերը գրել ազգայնական ոճով, նշել է Մերձավոր Արևելքի և Կովկասի հարցերով փորձագետ, քաղաքագետ, թուրքագետ Ստանիսլավ Տարասովը։ Նրա խոսքով, եթե կարդաս Ադրբեջանի, Վրաստանի, Բալթյան և այլ երկրների 8-10-րդ դասարանների դասագրքերը, ապա կարող ես շատ հետաքրքիր բաներ գտնել։
«Նայեք, թե ինչից սկսվեց Ուկրաինան: Եվ չգիտես ինչու, մենք գործնականում լռում էինք, կամ խոսում էինք լուռ», - tsargrad.tv-ի հետ զրույցում նշել է Ստանիսլավ Տարասովը։
Ըստ նրա կոպիտ կեղծիք է Ռուսաստանի կողմից Արևելյան Հայաստանի բռնակցման թեզը, ավելին, այդ թեզն ունի բավականին հետաքրքիր, նույնիսկ ինտրիգային կողմ:
«Փաստն այն է, որ ադրբեջանական դասագրքերում գրում են, որ Թուրքմենչայի խաղաղության պայմանագիրը, որը 1826-1828 թվականների պատերազմից հետո Ռուսաստանի կայսրությունը ստորագրել է Պարսկաստանի հետ, Ադրբեջանը բաժանել է երկու մասի, և դա «հարված է հասցրել ադրբեջանական ժողովրդի շահերին»։ Այն ժամանակ մենք հայերին ֆիզիկապես փրկեցինք, բայց հիմա պարզվում է, որ մենք, ընդհանուր առմամբ, խոչընդոտել ենք հայկական պետականության կայացմանը և այլն»,- իրավիճակի անհեթեթությունն է բացատրել Տարասովը։
Նրա խոսքով, սա նախկին խորհրդային հանրապետությունների ներքին քաղաքականության մեջ արմատացած միտում է, որի նպատակն է պատմական և քաղաքական գիտակցությունից դուրս բերել Ռուսաստանի ներկայության գործոնը և այլն։ Եվ մենք պետք է լրջորեն արձագանքենք դրան։ Եվ ոչ միայն արտաքին գործերի նախարարության պաշտոնական ներկայացուցիչ Մարիա Զախարովայի խոսքերով:
«Որտե՞ղ են ռուսական տները: Որտե՞ղ են ռուսական հրապարակումները։ Որտե՞ղ է հետխորհրդային տարածքում Ռուսաստանի ձեռքբերումների ռուսական քարոզչությունը: Մենք աշխատում ենք Աֆրիկայում, կարծես թե աշխատում ենք Մերձավոր Արևելքում, նույնիսկ աշխատում ենք Թեհրանում, բայց հետխորհրդային տարածքում ես ոչինչ չեմ տեսնում»,- վրդովված ասել է Տարասովը։
Պատմությունը, որպես գիտություն, կարող է լուսաբանել նախկինում տեղի ունեցածը դրանից որոշ դասեր քաղելու համար, բայց այդ գիտությունը կարող է օգտագործվել նաև որպես զենք իմպերիալիստական երկրների ձեռքում, նշում է թուրք պատմաբան, քաղաքագետ և պրոֆեսոր Մեհմեթ Փերինչեքը tsargrad.tv-ի հետ զրույցում։
«Նրանք օգտագործում են պատմությունը ոչնչացնելու այն ազգային պետությունները, որոնք խոչընդոտ են հանդիսանում նրանց ծրագրերի համար, - բացատրել է նա,- նաև պատմությունն օգտագործում են Ռուսաստանի դեմ: Պատմական այնպիսի մոտեցումներ են պարտադրում Հայաստանին, որ Հայաստանի նոր սերունդը մեծանա հակառուսական ոգով»։
Եթե Հայաստանում նոր սերունդն ունենա հակառուսական ոգի, կամ թշնամական տրամադրություններ Թուրքիայի, Ադրբեջանի և այլնի նկատմամբ, ապա Հայաստանը կընկնի Արևմուտքի գիրկը, վստահ է թուրք քաղաքագետը։
«Որովհետև, եթե Հայաստանը հավատա, որ Ռուսաստանը, Թուրքիան, Ադրբեջանը, Վրաստանը, Իրանը և մնացած բոլորը թշնամիներ ու բարբարոսներ են, ապա Հայաստանն իր միակ բարեկամը կհամարի Արևմուտքին»,- պարզաբանել է Մեհմեդ Փերինչեքը։
Նյութը հրապարակման պատրաստեց Կամո Խաչիկյանը
