Փաշինյանը Գյումրի է գնացել՝ տեղում ճնշելու իշխանություններին

Վարչապետի պաշտոնը զբաղեցնող Նիկոլ Փաշինյանը երեկ Արմավիր արշավելուց հետո այսօր էլ ուղևորվել է Գյումրի, որտեղ քաղաքի օրն են նշելու։ Հատուկ այդ նպատակով «բարձրաճաշակ» համերգ են կազմակերպել՝ երգիչ Թաթայի մասնակցությամբ։ Փաշինյանը նաև շրջելու է քաղաքում՝ ուղեկիցների և թիկնապահների ահռելի բազմության ուղեկցությամբ։

Երեկ Գյումրիի ավագանին ՔՊ խմբակցության պահանջով նիստ էր գումարել՝ քննարկելու նախկին քաղաքապետեր Վարդան Ղուկասյանի և Սամվել Բալասանյանի կողմից կատարված չարաշահումները, դիմելու դատախազությանը։ «Բալասանյան» դաշինքը, որն այժմ իշխանություն է Գյումրիում, կողմ է քվեարկել ՔՊ առաջարկին, այդկերպ զրկելով մանիպուլյացիաներ անելու, իրենց մեղադրելու հնարավորությունից։

ՔՊ-ն պահանջում է Գյումրիին վերադարձնել «Սև բերդը», որը պատկանում է Բալասանյան ընտանիքին։ Ժամանակին քարուքանդ այդ տարածքն այսօր Գյումրիի ամենաբարեկարգ շինություններից է, քաղաքի այցեքարտը, որտեղ բազմաթիվ մշակութային միջոցառումներ են կայացել, այդ թվում 2019 թ. Փաշինյանն այնտեղ է նշել Անկախության տոնը։

«Բալասանյան» դաշինքն ու «Քաղպայմանագիրը» ամիսներ առաջ խզեցին կոալիցիոն հուշագիրը, և այժմ ՔՊ-ն ամեն ջանք գործադրում է Գյուրիում իշխանափոխություն անելու, քաղաքապետի պաշտոնը խլելու համար։ Չի բացառվում, որ Փաշինյանն այսօր էլ մի շոու Գյումրիում սարքի՝ թիրախներն ուղղելով տեղական իշխանությունների ուղղությամբ։ 

Էմմա Աղաբեկյան