Այսօրվա իշխանությունները շառ ու փորձանքի մեջ են մտնում անընդհատ եւ վտանգում են մեր գոյությունը. Արամ Մանուկյան

ԱՄՆ-ում, Լոնդոնում չստացվեց ոչինչ, հիմա հաջորդ փուլն է, հերթականը ռուսները փորձելու են իրենց գլխավորությամբ նախաձեռնել գործընթացը, իրենց կազմակերպած գործընթացի միջոցով հասնել խաղաղության, արդյունքում լինելու է Հարավային Կովկասում իրենց ազդեցությունը պահելը, ուրիշ խնդիր չկա: Այս մասին NEWS.am-ի հետ զրույցում ասաց ՀԱԿ կուսակցության փոխնախագահ Արամ Մանուկյանը:

«Այսօր դաժան պայքար է գնում գերտերություների միջեւ, Արեւելքի եւ Արեւմուտքի միջեւ: Ուկրաինայի պատերազմը դրա ամենաակնառու փաստն է: Այս երեւույթը արդեն 4-5 տարի կրկնվում է: Նախաձեռնությունների խնդիր է՝ որ երկիրն է ուզում նախաձեռնել բանակցություններ վարելու այդ գործընթացը, ով պետք է վայելի դրա բարիքները: 44-օրյա պատերազմի ժամանակ Արեւմուտքը նախաձեռնեց խաղաղության գործընթաց, ԱՄՆ-ն նախաձեռբեց, բայց վերջնական արդյունքում ՌԴ նախաձեռնությամբ դադարեց պատերազմը: Սա այդ մեծ խաղի մասն է՝ ով է տիրություն անելու Հարավային Կովկասը: Իմ դիրքորոշումը մշտապես եղել է հետեւյալը, մենք պետք է խուսափեինք այդ կռվադաշտի դերից, կռվախնձորի դեր խաղալուղ: Մենք հատկապես ռուս-ուկրաինական կոնֆլիկտի ժամանակ պետք է կողմ չբռնեինք, որքանով որ դա հնարավոր էր, փոքր ազեգրի համար նվազագույն կորուստների ճանապարհը խուսափելն է, հանարավորինս չեզոք դիրք բռնելն է: ԱՄՆ-ում, Լոնդոնում չստացվեց ոչինչ, հիմա հաջորդ փուլն է, հերթականը ռուսները փորձելու են իրենց գլխավորությամբ նախաձեռնել գործընթացը, իրենց կազմակերպած գործընթացի միջոցով հասնել խաղաղության, արդյունքում լինելու է Հարավային Կովկասում իրենց ազդեցությունը պահելը, ուրիշ խնդիր չկա, նույն ուզում են ամերիկացիները, նույնը ուզում են եվրոպացիները»,-ասել է նա:

Մանուկյանը խոսելով այն մասին, թե որը պետք է լինի Հայաստանի դիրքորոշումն ու անելիքը նշում է, որ Հայաստանը չպետք է հակադրվի որեւէ կողմին, պետք է օգտագործի բոլորի հնարավորությունները:

«Տվյալ դեպքում մեզ համար առավել ցավագին կարող է լինել այդ գերտերություններից մեկին ուղղակի մերժելը: Տվյալ դեպքում Ռուսաստանի հետ այսքան վատ հարաբերություների, անգամ թշնամանքի  հասնող հարաբերությունների պատճառը երկուստեք է: Ես ռուսներին չեմ պաշտպանում, նրանց փաստաբանը չեմ, բայց հստակ կարող եմ ասել, որՀՀ իշխանությունները նպաստել են, ՀՀ իշխանությունները ավելին են անում, քան կարելի է պատկերացնել ՌԴ հետ հարաբերությունները վատացնելու համար: Մինչդեռ իրենք այնքան անազնիվ են, որ ԱՄՆ-ն, Եվրոպան, ԱՄՆ-ն շատ ավելի հաճախ, կոնկրետ հայտարարում են, որ ՌԴ հետ  ամբողջական տնտեսական, քաղաքական, ռազմական հարաբերությունների խզումը կարող էր աղետալի լինել ՀՀ համար, աղետալի, իրենք այս բառն են օգտագործում եւ հորդորում են փորձել հարաբերություններ պահել: Առավել եւս իրենք բացատրում են, որ ԱՄՆ-ն չի կարող մեր անվտանգությունը պահելը, նույնը Ֆրանսիան, նունը ԵՄ-ն: Շատ պարզ, շատ հստակ, ազնիվ ձեւով ուղղակի, ասում են, որ կարող են օգնել, պատրաստ են օգնել, բայց չեն կարող փոխել ռազմական այն համակարգը, որի մեջ մենք գտնվում ենք»,-ասաց նա:

Հարցին, թե ինչու է ՀՀ իշխանությունը շարունակում սրել հարաբերությունները ՌԴ-ի հետ Մանուկյանը նշում է, որ այսօրվա իշխանությունները կարծես նոր արկածներ են որոնում. «Շառ ու փորձանքի մեջ են մտնում անընդհատ սեփական նախաձեռնությամբ եւ վտանգում են մեր գոյությունը, մեր գոյապահպանական խնդիրն է այսօր վտանգված: Փոքր ազգերն իրավունք չունեն  նման դիրքորոշումն ունենալու»,-ասաց նա: