Գիտնականները հայտնաբերել են ամեն երեկո գարեջուր խմելու անսպասելի օգուտները
ՀԱՍԱՐԱԿՈՒԹՅՈՒՆ
Հրաշալի նորություն գարեջրի սիրահարների համար, պարզվում է, որ փոքր չափաբաժիններով այն ոչ միայն վնասակար չէ, այլ նաև օգտակար է, հայտնում է sports.kz-ն TSN.ua-ին հղումով։
Ընթրիքի հետ մեկ շիշ գարեջուր խմելն իրականում օգտակար է, հայտնում է Daily Mail-ը՝ վկայակոչելով Journal of Agricultural and Food Chemistry ամսագրում հրապարակված հետազոտությունը։ Հետազոտողները պարզել են, որ ամեն երեկո գարեջուր խմող տղամարդիկ ավելի առողջ աղիքներ ունեն: Տեսականորեն դա կարող է նվազեցնել այնպիսի հիվանդությունների զարգացման ռիսկը, ինչպիսիք են 2-րդ տիպի շաքարախտը և սրտի հիվանդությունները: Այնուամենայնիվ, ամեն ինչ չէ այնքան հրաշալի, որքան կարելի է մտածել։ Գիտնականները հայտնում են նաև, որ ոչ ալկոհոլային գարեջուրը ևս օգտակար ազդեցություն ունի օրգանիզմի վրա։
Լիսաբոնի NOVA համալսարանի մասնագետները խորհուրդ են տվել կանխարգելիչ նպատակներով խմել ոչ ալկոհոլային գարեջուր, քանի որ «ալկոհոլի օգտագործման ամենաանվտանգ մակարդակը իսպառ բացակայությունն է»։
23-ից 58 տարեկան 19 առողջ տղամարդկանց խնդրել են մեկ ամսվա ընթացքում ամեն գիշեր ընթրիքի հետ խմել 330 մլ-ոց մեկ շիշ գարեջուր: Տրվող գարեջրի մոտ կեսը պարունակել է 5,2% ալկոհոլ, իսկ մյուս կեսը եղել է ոչ ալկոհոլային։ Փորձի ավարտին տղամարդկանց քաշի, ճարպային զանգվածի կամ խոլեստերինի մակարդակի տեսանելի տարբերություններ չեն հայտնաբերվել:
Հետազոտությունից առաջ և հետո վերցված կղանքի նմուշների վերլուծությունը ցույց է տվել, որ նրանց աղիքներում ավելի շատ բակտերիաներ կան այն բանից հետո, երբ նրանք սկսել են խմել և՛ ալկոհոլային, և՛ ոչ ալկոհոլային գարեջուր: Երկու խմբերն էլ ունեցել են նմանատիպ բակտերիաների աճը՝ մոտ 7 տոկոս:
Հետազոտության հեղինակները նաև ասում են, որ ավելի շատ խմորիչով գարեջուրը, այսինքն չզտված գարեջուրը, կարող է էլ ավելի մեծ ազդեցություն ունենալ: Ենթադրվում է, որ գարեջուրը բարելավում է միկրոբիոմը՝ աղիների ներսում ապրող բակտերիաների և սնկերի հավաքածուն, քանի որ այն պարունակում է պոլիֆենոլներ: Դրանք միկրոէլեմենտներ են, որոնք բնականաբար հանդիպում են բույսերում, ընդ որում գարեջուրը պոլիֆենոլների միակ աղբյուրն է մարդու սննդակարգում: Ենթադրվում է, որ պոլիֆենոլները կարող են հասնել ստամոքս, և այնտեղ օգնել վերահսկել բակտերիաների աճը:
Այնուամենայնիվ, չպետք է մոռանալ, որ ալկոհոլի չարաշահումը աներևակայելի վտանգավոր է։ Հետազոտությունները ցույց են տալիս, որ միջին տարիքում ամեն երեկոր մեկ բաժակ գինի կամ մեկ շիշ գարեջուրը կարող է ձեր ուղեղը ծերացնել երկու տարով: Ալկոհոլի չարաշահումը կապված է քաղցկեղի մի քանի տեսակների, լյարդի հիվանդության, պանկրեատիտի, սրտի անբավարարության և ուղեղի վնասների հետ: Ուստի աղիքային միկրոֆլորան բարելավելու համար ավելի լավ է խմել ոչ ալկոհոլային գարեջուր։
Նյութը հրապարակման պատրաստեց Կամո Խաչիկյանը
