«Փաշինյանը կառչել է Ռուսաստանից»
ՔԱՂԱՔԱԿԱՆՈՒԹՅՈՒՆ
Հայաստանի իշխանությունները Մոսկվայի հասցեին հնչեցվող հրապարակային մեղադրանքներից անցել են հարաբերություններ հաստատելուն, գրում է ng.ru-ն։ Օրինակ Երևանը հրաժարվել է Եվրամիությանն անդամակցելու վերաբերյալ հանրաքվե անցկացնելու մտքից, որոշել է տնտեսական կապեր զարգացնել Ուկրաինայի զինված ուժերից տուժած Բելգորոդի հետ:
Ռազմավարական հետազոտությունների և նախաձեռնությունների վերլուծական կենտրոնի ղեկավար Հայկ Խալաթյանը Հայաստանի իշխանությունների այդ քայլերը կապում է Ռուսաստանից եկող ազդակների հետ։
«Օրինակ, անցյալ շաբաթ փոխվարչապետ Ալեքսեյ Օվերչուկը բավականին լուրջ նախազգուշացում արեց: Նա հայտարարեց ԵՄ-ի և ԵԱՏՄ-ի անհամատեղելիության մասին, ինչպես նաև մատնանշեց, որ որոշ արտատարածաշրջանային խաղացողների մուտքը տարածաշրջան հետևանքներ կունենա»,- հիշեցրել է փորձագետը։
Միևնույն ժամանակ, Խալաթյանը կարծում է, որ Հայաստանի ղեկավարն Արևմուտքի հետ մերձեցման հարցում ընդամենը մարտավարական դադար է վերցրել։ Ըստ վերլուծաբանի այդ ռազմավարությունից իսպառ հրաժարում հնարավոր է միայն այն դեպքում, եթե Փաշինյանի համար իշխանությունը պահպանելու սպառնալիք առաջանա։
«Միևնույն ժամանակ, հարկ է նշել, որ Արևմուտքը, մասնավորապես Եվրամիությունը, պատրաստ չէ փոխհատուցել Հայաստանի տնտեսական հնարավոր կորուստները կամ չեզոքացնել առկա սպառնալիքները անվտանգության ոլորտում, անկախ նրանից, թե ինչ կասեն դրա մասին հենց Հայաստանի ներսի արևմտամետ ուժերը։ Բայց ԵՄ-ն և ԱՄՆ-ը ցանկություն ունեն օգտվելու հարմար իրավիճակից Ռուսաստանին հանրապետությունից դուրս մղելու և ընդհանրապես Հարավային Կովկասում նրա ազդեցությունը նվազեցնելու համար»,- ընդգծել է Խալաթյանը։
Իր հերթին, Կովկասի ինստիտուտի գիտաշխատող Հրանտ Միքայելյանը ենթադրում է, որ Հայաստանի իշխանությունները հնարավոր է առաջ էին մղում հանրաքվեի գաղափարը հույս ունենալով ստանալ որոշակի դրական արձագանք ԵՄ-ից, սակայն դա չեղավ։ Արդյունքում նրանք որոշեցին հարթել Ռուսաստանի հետ հարաբերությունների կոպիտ եզրերը։
«Փաշինյանը որոշումներ է կայացնում ելնելով առկա հանգամանքներից: Այսպիսով, նրա վարքագծի վրա ազդում են արևմտյան երկրների և Ռուսաստանի քայլերը»,- նշել է փորձագետը։
Նյութը հրապարակման պատրաստեց Կամո Խաչիկյանը
