Եվրադատարանն ասում է՝ գերիներին վերադարձնելու հարցով ձեր պետությունը պիտի զբաղվի

«Մեր ցավը ոչ մեկ չի հասկանա, երբ գիտես որդիդ ողջ է, բայց Ադրբեջանում։ Ոչ մեկ չի մտածում գերիներին վերադարձնելու մասին։ Մեկ-մեկ ուզում եմ գժվել»,- MediaHub-ին պատմում է արդեն 9 ամիս ադրբեջանական բանտում գտնվող Վասիլի Բեգլարյանի մայրը։ 

Հադրութից տեղահանված Բեգլարյանների ընտանիքը գերության մեջ գտնվող մյուս անձանց հարազատների հետ դիմել են բոլոր հավանական և անհավանական կառույցներին ու կազմակերպություններին, որը, ցավոք, առ այսօր արդյունք չի տվել։ 

«Ինն ամիս է մենք չենք ապրում։ Դուռ չի մնացել, որ չծեծենք, բոլորն ասում են՝ «բանակցում ենք»։ Կարմիր խաչն ընտանիքների ու գերիների միջև կապն է ապահովում, մեզ է փոխանցում նամակներ, կարճ տեսագրություններ, առողջական վիճակի մասին տվյալներ: Եվրադատարանն ասում է՝ «մենք իրավասու չենք, ձեր պետությունը պիտի զբաղվի»։ Արդեն մենք էլ ենք մոլորվել, չգիտենք՝ ինչ անենք, էլ ո՞ւմ դիմենք»,- ասաց նա։ 

Գերիների հարազատները փորձել են հանդիպել նաև Նիկոլ Փաշինյանի հետ։ Տիկին Նունեի խոսքով՝ չի ընդունել։ 

«Միայն խոսնակին բանավոր փոխանցել ենք մեր ցանկությունը, որ ուզում ենք հանդիպել։ Նա էլ ասել է, որ «պետությունը այդ հարցով զբաղվում է»»։

Երեկ Բաքվում պահվող հայ գերիների տուն զանգելու օրն էր։ Վասիլին ևս զանգել է։ Դա, թերևս, միակ բանն է, որ ծնողները վերադարձի հույսը չեն կորցնում։

«Ասում ա՝ «մամա, իմ լավ լինելը քեզանից ա կախված։ Որ գամ, ամեն ինչ իր տեղը կընկնի, լավ կլինի», բայց ե՞րբ։ Ամեն անգամ հարցնում ա, թե՝ «մեր մասին խոսո՞ւմ են, հիշո՞ւմ են, մտածող կա՞»… արդեն չգիտեմ՝ ինչ պատասխանեմ։ Շատ ա մտածում իմ առողջականի, սոցիալական վիճակի մասին։ Հավատացնում եմ, որ ամեն ինչ լավ ա մեր մոտ։ Մենք էստեղ ենք տանջվում, իրենք՝ էնտեղ»,- հավելեց Վասիլիի մայրը՝ Նունե Դադայանը։ 

Ադրբեջանը դատական վարույթ է սկսել Բաքվում պահվող գերիներից 15-ի նկատմամբ։ Ծնողներն անհամբերությամբ սպասում են, թե ի՞նչ որոշում կկայացնի դատարանը, կվերադառնա՞ն արդյոք ամենահարազատները. «Հավատներս չենք կորցնում»…

Հունան Թադևոսյան