Հայաստանում անվանվել են Մոսկվայի և Երևանի հարաբերությունների ճգնաժամային կետերը
ՔԱՂԱՔԱԿԱՆՈՒԹՅՈՒՆ
Հայաստանի և Ռուսաստանի հարաբերությունները ճգնաժամի մեջ են, հատկապես քաղաքական և անվտանգության ոլորտներում, NEWS.ru-ի հետ զրույցում ասել է հայ քաղաքագետ, Երևանի Կովկասի ինստիտուտի տնօրեն Ալեքսանդր Իսկանդարյանը։ Ըստ նրա դա վերաբերում է նաև ՀԱՊԿ-ին:
- Երևանն արդեն չի մասնակցում ՀԱՊԿ-ի աշխատանքներին և չի ֆինանսավորում այն։ Անկախ նրանից, թե Հայաստանը դուրս կգա կազմակերպությունից, թե ոչ, չի փոխվի այն փաստը, որ Երևանի և Մոսկվայի միջև անվտանգության հարաբերությունները գտնվում են խնդրահարույց վիճակում առնվազն 2020 թվականի ղարաբաղյան երկրորդ պատերազմից հետո,- ասել է Իսկանդարյանը։
Ըստ քաղաքագետի սոցիոլոգիական ուսումնասիրությունները ցույց են տալիս, որ Հայաստանում ռուսական քաղաքականության նկատմամբ վերաբերմունքը գնալով վատթարանում է։
- Հայերի և ռուսների մեջ կան տարբեր մարդիկ, նրանք կարող են իրենց վերաբերմունքն ունենալ Ռուսաստանի կամ Հայաստանի նկատմամբ։ Խոսքը ոչ թե ժողովուրդների փոխհարաբերության, այլ էլիտաների ու պետությունների փոխհարաբերության մասին է։ Պետությունների միջև փոխգործակցության քաղաքական ձևերի շրջանակներում դժվար է հիմք ընդունել այնպիսի կատեգորիա, ինչպիսին է ժողովուրդների բարեկամությունը,- պարզաբանել է նա։
Փորձագետի կարծիքով անվտանգության ճգնաժամը կարող է ավելի զարգանալ, սակայն Հայաստանը Ռուսաստանի Դաշնության հետ միասին դեռևս ԱՊՀ, ՀԱՊԿ և ԵվրԱզԷՍ-ի անդամ է։ Բացի այդ, Երևանն ու Մոսկվան դեռևս ունեն երկկողմ հարաբերությունների բավականին լուրջ ձևաչափ կնքված բազմաթիվ փաստաթղթերով։
- Իսկ տնտեսական ոլորտում ճգնաժամ չկա։ Ռուս-հայկական գործարար հարաբերություններն աճում և բարելավվում են: Մշակութային ոլորտում ևս առանձնակի ճգնաժամեր չկան։ Ես չեմ նկատել, որ Հայաստանում մարդիկ սկսել են ավելի վատ վերաբերվել Լև Տոլստոյին կամ Ալեքսանդր Պուշկինին»,- եզրափակել է քաղաքագետը։
Ավելի վաղ ՌԴ ԱԳՆ պաշտոնական ներկայացուցիչ Մարիա Զախարովան ասել էր, որ Ռուսաստանը կզարգացնի հարաբերությունները և կլինի բարեկամ Հայաստանի հետ։ Նրա խոսքով, Մոսկվան «այնքան հոգի, ուժ և ջերմություն է ներդրել այդ հարաբերությունների զարգացման համար, որ ոչ ոք չի կարող այդ ամենը փչացնել»:
Նյութը հրապարակման պատրաստեց Կամո Խաչիկյանը
