«Մամ, մեր պետությունը ինչ որ քայլ չի՞ անում մեզ վերադարձնելու համար»․ գերիների հարցով Երևանը չի զբաղվում
ՔԱՂԱՔԱԿԱՆՈՒԹՅՈՒՆ
«Բաքվում պահվող հայ ռազմագերիների և պատանդառված ռազմաքաղաքական ղեկավարությանը վերադարձնելու համար պաշտոնական Երևանը որևէ քայլ չի ձեռնարկում»,- այս մասին MediaHub-ի հետ զրույցում ասում է 9 ամիս առաջ հենց այս օրը գերեվարված զինծառայողներից մեկի մայրը։
Նրա որդին գերեվարվել է Արցախում, նախորդ տարվա սեպտեմբերյան ռազմական գործողությունների ընթացքում։ Գերեվարվելու մասին լուրը մայրն իմացել է միայն շաբաթներ հետո, երբ անծանոթ համարից զանգ է ստացել։
«Ասաց՝ «մամ, ես եմ, ողջ եմ, Բաքվում եմ, գերի են վերցրել», ու անջատեց։ Դրանից հետո սկսվել է մեր մղձավանջը։ Ու առ այսօր որ պետական կառույցին դիմել ենք, որևէ մեկը հստակ չի պատասխանում։ Միայն Կարմիր խաչի միջոցով կապ ենք հաստատում, խոսում, ձայնը լսում ու փարատվում, բայց մեր էրեխեքին Հայաստանին փոխանցելու մասին խոսք չկա»,- ասում է կինը։
Գերիների ու պատանդների ընտանիքների հետ MediaHub-ը պարբերաբար կապ է հաստատում, հաճախ անդրադառնում, սակայն, ինչպես ծնողները, այնպես էլ հումանիտար առաքելություն իրականացնող կազմակերպություններն իրավասու չեն պատասխանելու՝ արդյո՞ք վերադարձ կլինի։
«Հույսով ենք ապրում, բայց գնալով այդ հույսն էլ, հավատն էլ մարում է։ Երբ խոսում եմ տղայիս հետ, ինքն էլ այնտեղից է հարցնում, փակ ենք խոսում, հասկացնում է՝ «մամ, մեր պետությունը ինչ որ քայլ չի՞ անում մեզ վերադարձնելու համար»... ո՞նց ասեմ, որ դեռ «Խաղաղության խաչմերուկ» ենք կառուցում։ Սպասումից առողջական վիճակս է վատացել»,- արտասվում է կինը։
Մամուլում օրերս հայտնվեց տեղեկություն, որ գործարար, Արցախի նախկին պետնախարար Ռուբեն Վարդանյանին Բաքվում խոշտանգել են, խախտելով միջազգային մի շարք կոնվենցիաներ։
«Ոնց ուզում, վարվում են մեր տղաների հետ, նույնիսկ Ռուբեն Վարդանյանի պես «կալիբր» ունեցող մարդուն են նվաստացնում, երևի Հայաստանի ղեկավարի սրտով է։ Ռուսաստանը և Ադրբեջանը հազար անգամ խախտել են նոյեմբերի 9-ի փաստաթղթի կետերը, իսկ մենք չկարողացանք նույնիսկ մեր գերիներին տուն բերել, դեռ ենթարկվում ենք, թե երբ ենք վերջնական կործանվելու»,- եզրափակեց մայրը։
Հունան Թադևոսյան
