Հայ գործարարը շուտով կարող է դառնալ Անգլիայի Պրեմիեր լիգայի ակումբի սեփականատեր
ՀԱՍԱՐԱԿՈՒԹՅՈՒՆ
The Athletic-ի տվյալներով լոնդոնաբնակ հայազգի գործարար Վաչե Մանուկյանը ԱՄՆ-ից և Պարսից ծոցի երկրներից ներդրողների հետ միասին 400 միլիոն ֆունտ ստեռլինգ է առաջարկել «Էվերտոն» ֆուտբոլային ակումբը գնելու համար։
Վաչե Մանուկյանը զվարճանքի և անշարժ գույքի ոլորտում հայտնի հայ մագնատ Վաչե «Բոբ» Մանուկյանի և լոնդոնաբնակ հասարակական գործիչ Ռաֆֆի Մանուկյանի եղբորորդին է, ովքեր երկուսն էլ Բեյրութի հայկական սփյուռքի ներկայացուցիչներ են։ Վաչեն գործընկեր է IMS Digital Ventures գլոբալ ներդրումային ընկերությունում, որը մասնագիտացած է տեխնոլոգիաների մեջ։
Այս պահին Վաչե Մանուկյանն է դարձել «Էվերտոնի» գնման վերջին թեկնածուն։ Մանուկյանի գլխավորած միջազգային ներդրողների խումբը միացել է ակումբի հնարավոր նոր սեփականատերերի աճող թվին ներկայացնելով 400 միլիոն ֆունտ ստեռլինգ արժողությամբ համարժեք կապիտալի առաջարկ։ Թեկնածուների շարքում առանձնանում են բրիտանացի գործարարներ և «Էվերտոնի» երկարամյա երկրպագուներ Էնդի Բելլը և Ջորջ Դաունինգը, որոնք արդեն մաս են կազմում ամերիկյան ներդրումային ընկերության MSP Sports Capital-ի գլխավորած խմբի։ Անցյալ տարի MSP Sports Capital-ը «Էվերտոնին» տրամադրել էր 158 միլիոն ֆունտ ստեռլինգ վարկ, ինչը Բելլին և Դաունինգին լրացուցիչ խթան է տալիս պաշտպանելու իրենց ներդրումները ակումբում։ Նրանց առաջարկը, որը ներկայացվել է անցած շաբաթ, ներառել է նոր կապիտալի և 350 միլիոն ֆունտ ստեռլինգ արժողությամբ վարկի խառնուրդ, որը կօգտագործվի ակումբի նոր մարզադաշտի ստեղծման նպատակով և կվերաֆինանսավորի «Էվերտոնի» գոյություն ունեցող պարտքերը։ Այդ վարկը կտրամադրվի BDT & MSD Partners առևտրային բանկի կողմից, որը ի սկզբանե ստեղծվել է ամերիկացի IT միլիարդատեր Մայքլ Դելի ունեցվածքի մեջ ներդրումներ կատարելու համար։
Երրորդ առաջարկը, պարադոքսալ կերպով, գալիս է Բելլի և Դաունինգի գործընկեր MSP Sports Capital-ից։ Նյու Յորքում տեղակայված այդ հիմնադրամը հավաքել է նոր խումբ, որի նպատակն է ստանալ ամբողջական վերահսկողություն ակումբի վրա։ Առաջարկը ենթադրաբար կապիտալի և պարտքի բարդ խառնուրդ է։
Բացի այս երեքից, կան նաև Ջոն Տեքստորը և Դան Ֆրիդկինը, երկու ամերիկացի գործարարներ, ովքեր արդեն ստեղծել են մի քանի ակումբային խմբեր։
Իսկ ո՞վ է Վաչե Մանուկյանը:
Վաչե Մանուկյանը, 45 տարեկան, IMS Digital Ventures գլոբալ տեխնոլոգիական ներդրումային ընկերության գործընկերն է։ Նրա ներդրողների խումբը ներառում է ներկայացուցիչներ Պարսից ծոցի երկրներից և ԱՄՆ-ից։ Մանուկյանների ընտանիքը հայտնի է իր հաջողված բիզնես նախագծերով և ակտիվ մասնակցությամբ հայկական համայնքի կյանքում։ 2021 թվականին Վաչեն և նրա կինը՝ Թամար Մանուկյանը խոստացել են 1 միլիոն դոլար տրամադրել AGBU (Հայկական ընդհանուր բարեգործական միության) ծրագրերի և գործունեության ընդլայնման աջակցությանը։
Նյութը հրապարակման պատրաստեց Կամո Խաչիկյանը
