Ես Նիկոլ Փաշինյանին վաղուց եմ ներել, իմ Աբգարը ինձ ասել է, որ ես իրան ներեմ, ինձ տեսիլք է եկել, ասել է. Գեղամ Նազարյան
ՔԱՂԱՔԱԿԱՆՈՒԹՅՈՒՆ
«Հայաստան» խմբակցության պատգամավոր Գեղամ Նազարյանը կարծում է, որ իր անվան շուրջ աղմուկը ուղղորդվում է. «Ես գիտեմ ովքեր են, չեմ հրապարակում, հետո իմ հուշերի գրքում մի օր կգրեմ էդ մասին, չեմ ուզում, որ տնից ամոթով դուրս չգան…Իմ համար, իմ ընտանիքի համար ցավալի է, երբ կարդում ենք, որ Գեղամ Նազարյանին Նիկոլ Փաշինյանը 3,5 մլն դոլար է տվել, որ ֆրակցիայում բաժանի, Սեյրան Օհանյանն էլ անտառը ճղելով շուտ ուզում էր հասնի Կիրանց, որ 100 հազարը վերցնի: Էս մակարդակի ենք հասել:
Իրոք, ուզում եմ շարժմանը քիչ երեւամ, որովհետեւ անհարկի մեղադրանքներ են լինում՝ էս բառը էսպես չասեցիր, շեշտը սխալ դրեցիր…Ո՛չ ասել եմ ես եմ վարչապետի թեկնածուն, ո՛չ ասել եմ, որ ուզում եմ հեղափոխություն անեմ, միապետություն հաստատեմ, ես միապետ դառնամ, ոչ ասել եմ՝ ուզում եմ օդանավակայանը վերցնեմ ինձ, անկեղծ եմ ասում, իրոք, չեմ հասկանում»: Գեղամ Նազարյանը վստահեցրեց, որ միտք չի ունեցել Կիրանցում ճանապարհը փակողներին ցրել. «Մեջքիս հետեւից, անունները չտամ, մի քանի հոգի ասեցին՝ ժողովուրդ, Գեղամն եկել ա, որ ասի՝ ճանապարհը բացեք, անմիջապես որակում են սադրանք: Էնքան էն դպրոցի մասին ասեցին Գեղամի առանձնատուն դառավ սահմանային եսիմ ինչ:
Գեղամի տառապանքները հասկանո՞ւմ են ինչ է, երբ իր այգուց տեսնում է սահմանը»: Հարցրեցինք՝ դուք պահանջո՞ւմ եք վարչապետ Նիկոլ Փաշինյանի հրաժարականը՝ նա պատասխանեց. «Դա անքննարկելի ճշմարտություն է: Ոչ թե Նիկոլի անձի դեմ եմ ես պայքարում, անհատ Գեղամը իր ընկեր Նիկոլի դեմ կարա անհատ պայքարի, բայց ես ասում էի՝ ժողովուրդ, հանուն ՀՀ-ի: Եթե Նիկոլը չլիներ իմ ընկերը, լիներ իմ զույգ եղբայրը, ես էլի պայքարելու էի, որովհետեւ մեր Հայաստանի շահերից չի բխում, որ պարտություն կրած մարդը շարունակի ղեկավարել: Բնականաբար, այդ կարծիքը չի կարա փոխվի:
Ինձ ասում են՝ 21 թվին ուրիշ ձեւ էիր ելույթ ունենում, ես հո դերասա՞ն չեմ, 21 թվին իմ էմոցիաները այլ էին, 24 թվին այլ է, ուզում են մուր քսեմ, արցունքներ, հուզական խո՞սք: Չէ»: Խոսելով «Տավուշը հանուն հայրենիքի» շարժման մասին՝ Գեղամ Նազարյանն ասաց, որ այն բացասական է ազդում Բաղրամյան պողոտայում անցուդարձի վրա, բայց այդ ցասումը չի կարող դրական ազդեցություն չունենալ երկրի վրա: Մենք պիտի օգնենք Փաշինյանին, որ հրաժարական տա, չի տալիս մի շարք պատճառներով, այդ թվում իր իսկ կողմից գեներացված չարության մթնոլորտի համար»:
Ճշտեցինք՝ Փաշինյանը վախենում է, որ երբ լծակներից զրկվի իրեն կսպանե՞ն՝ նա պատասխանեց. «Չե, ես չեմ ուզում հավատամ, որ հայ մարդը հային կսպանի: Մարդկայնորեն իրեն հասկանում եմ. էսքան ֆեյսբուքյան գրառում տեսնելով, որ քեզ կախելու ենք, կտրտելու ենք, մորթելու ենք, դնենք թթու ջրի մեջ բնականաբար, ինքը չէ՝ բոլորիս մոտ էլ վախեր կառաջանան: Մենք պիտի սիրենք իրար, ներենք: Սրբազանն ասում է, սրբազանին ասում են՝ ես պատրաստ չեմ ներել, մեկ ա, պետք ա մորթվեն: Ստի իշխանությանը չես կարա ստով հաղթես, չարի իշխանությանը չես կարա չարով հաղթես, բանաձեւը էստեղ է»:
