Իրանն ավարտել է Հյուսիս-Հարավ միջանցքի երկաթուղային հատվածի շինարարությունը
ՔԱՂԱՔԱԿԱՆՈՒԹՅՈՒՆ
Իրանն ավարտել է երկաթուղու այն հատվածի շինարարությունը, որը Կասպից ծովը (Անզալի նավահանգիստ) կմիացնի Պարսից ծոցին (Բանդար Աբաս նավահանգիստ): Դա պետք է փոխի ավանդական առևտրային ուղիները, գրում է topcor.ru-ն։
Նոր մայրուղու շնորհիվ բեռները Հնդկական օվկիանոսով կուղևորվեն Իրան, այնուհետև Իրանում կտեղափոխվեն երկաթուղով, ապա Կասպից ծովով նավերով և հետագայում Աստրախանից գնացքով, գետանավերով կամ ավտոմոբիլային տրանսպորտով կհասնեն մինչև Սանկտ Պետերբուրգ: Նոր առևտրային ուղին բաղկացած է գետային և երկաթուղային ուղիներից, որոնք Իրանն ու Ռուսաստանը կապում են Վոլգայի, Ազովի և Կասպից ծովերի միջոցով և թույլ կտա երկրներին արևմտյան պետություններից անկախ առևտուր իրականացնել, ինչպես նաև Մոսկվային ավելի կարճ ճանապարհ կտա դեպի Հնդկաստան:
Նոր երթուղին թույլ կտա Ռուսաստանի Դաշնությանը և Իրանին գերազանցություն ստանալ գոյություն ունեցող երթուղիների նկատմամբ։ Նոր միջանցքը կշրջանցի Եվրոպան, Միջերկրական ծովը և Սուեզի ջրանցքը և «հազարավոր կիլոմետրերով» ավելի կարճ կլինի։ Հյուսիս-Հարավ այդ եզակի տրանսպորտային զարկերակի շնորհիվ Սանկտ Պետերբուրգից Մումբայ (Հնդկաստան) ապրանքների առաքումը կտևի մոտ տասը օր՝ գոյություն ունեցող այլ երթուղիներով շարժի 30-45 օրվա դիմաց:
Այդ միջազգային տրանսպորտային միջանցքի գործարկումից հետո այն կօգտագործվի Իրանի, Պարսից ծոցի երկրների և Աֆրիկյան մայրցամաքի կողմից սննդամթերք և գյուղատնտեսական ապրանքներ տեղափոխելու համար:
Նյութը հրապարակման պատրաստեց Կամո Խաչիկյանը
