Ծանոթ ու միաժամանակ անհայտ … Կեպի գլխարկ
ՖՈՏՈ
Կեպին գլխարկ է, որն իր տեսքով հիշեցնում է ֆուրաժկան և հատկապես անփոխարինելի է շոգ կամ անձրևոտ եղանակին: Այն կարևոր տարր է հատկապես սպորտով զբաղվելու, զբոսաշրջության, որսի և այլ զբաղմունքների ժամանակ։ Կեպիի պատմությունը սերտորեն կապված է նրա մերձավոր ազգականի՝ բեյսբոլի գլխարկի՝ բեյսբոլկայի հետ։
Հովարներով գլխարկներ կրելու գաղափարը ծագել է դեռ Հին Եգիպտոսի բնակիչների մոտ, այնուհետև այն փոխառվել է միջնադարյան ասպետների կողմից սաղավարտներ պատրաստելիս, և միայն 19-րդ դարում է հովարով գլխարկը ձեռք բերել քիչ թե շատ ժամանակակից իր տեսքը:
Դա տեղի է ունեցել բրիտանական բանակում, որտեղ որոշել են հովարով գլխարկներ կրել: Այնուամենայնիվ 1830 թվականին հենց Ֆրանսիայում է հայտնվել գլխարկ, որի անվանումը համահունչ է եղել կեպիին՝ «kepi», և այն դարձել է ֆրանսիացի զինվորականների համազգեստի մի մասը փոխարինելով սարսափելի անհարմար կիվերներին:
Այդ նոր գլխարկը նրբագեղ էր և հաճելի կրելը, իսկ ահա կիվերները չափազանց անհարմար էին իրենց մեծ քաշի և չափերի պատճառով: Ի բարեբախտություն զինվորականների ինչպես կիվերներն այնպես էլ կեպիներն ունեին մի կարևոր ընդհանուր հատկանիշ՝ հովարի առկայությունը: Առաջին կեպիները հարթ կլորացված անկյուններով հովար ունեին, բայց ավելի ուշ դրանք սկսեցին ավելի խորն ընկնել ծածկվելով գլխարկի ծալքով: Այդ գլխարկի երկրորդ տարբերակն ուներ քառակուսի հովար։ Հետագայում կեպիի կառուցվածքի փոփոխություններ տեղի ունեցան, քանի որ առաջին տարբերակը, գլխարկի ծալքով կլոր հովարի շնորհիվ, ավելի էր հակված անձրևից թրջվելու ու ծանրանալու, իսկ եղանակի քմահաճությունները չպետք է խանգարեին ճակատամարտին։
Կեպին հետագայում ավելի լայն տարածում գտավ ամբողջ աշխարհում այն բանից հետո, երբ ամերիկացիներն այդ լավ գաղափարը վերցրեցին ֆրանսիացիներից և բրիտանացիներից: Դա են հաստատում քաղաքացիական պատերազմի մասին
Նկարազարդումները, լուսանկարները, աշխատանքները, որտեղ երևում է, որ զինվորականները կրում են նման գլխարկներ։ Բրինթոն Մակքելան անունով գեներալն է համբավ նվիրել կեպիին: Նա մշտապես էր կեպի կրում, որի արդյունքում էլ նրա ենթակաները հաճույքով ընդունեցին իրենց զորավարի փորձը: Քսաներորդ դարի սկզբին կեպիները հսկայական ժողովրդականություն էին ձեռք բերել:
Բանն այն է, որ կեպի կրել կարող էր իրեն թույլ տալ բնակչության մի լայն շերտ։ Էժան և նորաձև, էլ ի՞նչ է պետք: Սակայն քսաներորդ դարի կեսերին կեպիների պահանջարկը նվազել է, քանի որ նոր միտում է հայտնվել՝ բեյսբոլկա գլխարկները:
Դրանք կրում էին մարզիկները, քանի որ ի տարբերություն կեպիների բեյսբոլկաներն ավելի երկար հովար ունեին և օգնում են պաշտպանվել կիզիչ արևից, որը բացի այդ ընկնում է ուղիղ աչքերի մեջ: Եվ շուտով բեյսբոլի գլխարկներ հայտնվեցին տարբեր սպորտաձևերի եռանդուն երկրպագուների մոտ։
Ներկայումս մարդկանց կեպիների ու բեյսբոլի գլխարկների լայն տեսականի է առաջարկվում, յուրաքանչյուրը կարող է ընտրել ցանկացած գույնի և ցանկացած տեսակի գլխարկ։ Դրանք հիմա էլ օգտագործվում են և՛ որպես ամենօրյա ոճային գլխարկներ, և՛ որպես մարքեթինգային գործիք, և՛ որպես պաշտպանություն անձրևից ու շոգից։
Կ. Խաչիկյան
