Փորձագետը նշել է Հայաստանում զանգվածային բողոքի ցույցերի պատճառը
ՔԱՂԱՔԱԿԱՆՈՒԹՅՈՒՆ
Հայաստանում զանգվածային բողոքի ցույցերը երկրի բնակիչների ընդհանուր հիասթափության արդյունքն է, որը մի քանի խոշոր պարտությունների հետևանքով է, ասել է Մոսկվայի Լոմոնոսովի անվան պետական համալսարանի համաշխարհային քաղաքականության ֆակուլտետի պրոֆեսոր Ալեքսեյ Ֆենենկոն, գրում է gazeta.ru-ն։
Ցուցարարների հիմնական նպատակը վարչապետ Նիկոլ Փաշինյանի հրաժարականին հասնելն է, քանի որ նրան են համարում Ադրբեջանին տարածքներ հանձնելու մեղավորը, նշել է գիտնականը։
«Հայաստանում կա սեփական պարտության ցավալի զգացում, մի զգացում, որը կուտակվում էր վերջին մեկ տարվա ընթացքում»,- համոզված է Ֆենենկոն։
Երկրի բնակիչների հիասթափությունը պրոֆեսորը բացատրել է նրանով, որ նրանք հույս ունեին վերադարձնել իրենց կորցրած տարածքները, իսկ ավելի ուշ վրեժ լուծել Ադրբեջանից արևմտյան զենքի օգնությամբ, սակայն ոչ ոք չաջակցեց Հայաստանին Ադրբեջանի հետ առճակատման հարցում, իսկ երկրի սեփական բանակը թույլ է։ Նա հիշեցրել է, որ ընդդիմությունը ցանկանում է վարչապետ դարձնել Բագրատ արքեպիսկոպոս Գալստանյանին, ով դարձել է բողոքի շարժման առաջնորդ։
Դա երկրի ժողովրդի կողմից ձեռնարկված վերջին քայլն է, քանի որ նախկինում եկեղեցին փորձում էր չխառնվել քաղաքականությանը, նշել է պրոֆեսորը։ «Ըստ ամենայնի, բոլոր միջոցներն են սպառվել, քանի որ մարդիկ ստիպված դիմել են եկեղեցուն»,- եզրափակել է նա։
Հիշեցնենք, որ Հայաստանում բողոքի ակցիաներ են ընթանում Փաշինյանի հրաժարականի պահանջով։ Արքեպիսկոպոս Գալստանյանն իր կողմնակիցներին կոչ է արել անհնազանդության զանգվածային ակցիաներ իրականացնել գործող իշխանության դեմ։ Հաղորդվել է, որ ոստիկանությանը չենթարկվելու համար ցուցարարներին բերման են ենթարկում։
Նյութը հրապարակման պատրաստեց Կամո Խաչիկյանը
