Արդյո՞ք բողոքի ակցիաները կարող են փոխել իրավիճակը Հայաստանում
ՔԱՂԱՔԱԿԱՆՈՒԹՅՈՒՆ
Երևանում շարունակվում են քաղաքացիական անհնազանդության գործողությունները, լարվածությունն աճում է, ոստիկանությունը բավականին կոշտ բերման է ենթարկում ամենաակտիվ ցուցարարներին։ Միաժամանակ Բագրատ Գալստանյանը, որին ցուցարարներն առաջադրել են որպես վարչապետի թեկնածու, կրկին հնչեցրել է Փաշինյանի հրաժարականի կոչ։
Որքանո՞վ է կայուն իշխանությունը Հայաստանում և արդյոք հանրապետությանը կարող է սպառնալ ապակայունացում՝ iz.ru-ի նյութում։ Չնայած Բագրատ Գալստանյանի «Տավուշը հանուն հայրենիքի» բողոքի շարժման ակտիվությանը, ներկայիս իշխանությանը տապալելու հնարավորություններ չկան, վստահ են փորձագետները։
— Նմանատիպ քաղաքական գործընթացները կարող են հաջող լինել և հանգեցնել նախանշված նպատակների իրականացմանը միայն այն դեպքում, եթե դրանք ուղեկցվեն իշխանական վերնախավերի պառակտմամբ։ Այս պահի դրությամբ Հայաստանում էլիտաների պառակտման նշաններ չեն երևում,- բացատրել է քաղաքագետ, Հարավային Կովկասի հարցերով փորձագետ Անդրեյ Արեշևը։
Փորձագետի կարծիքով Փաշինյանի կառավարության աջակցությունն արևմտյան երկրներից, ինչպես նաև Թուրքիայից ու Ադրբեջանից, կարող է կանխել ցուցարարներին։ Արտասահմանյան պետությունները գոհ են ներկայիս իշխանության արտաքին քաղաքականությունից, և դա դժվարացնում է ցուցարարների իշխանությունը հեռացնելը։
— Այս պահին ռեժիմը բավականին կայուն է։ Իսկ Բագրատ արքեպիսկոպոսը, նրան սատարող մարդիկ և մյուս ընդդիմադիր ուժերը համակարգային լուրջ դրական օրակարգ չունեն։ Նրանք ոչինչ չեն կարող առաջարկել հայ հասարակությանը,- ասել է ՄԳԻՄՕ-ի կովկասյան սեկտորի ղեկավար Վադիմ Մուխանովը։
Այնուամենայնիվ ժամանակակից Հայաստանի պատմության մեջ առաջին անգամ բողոքի ակցիաները գլխավորում է եկեղեցու ներկայացուցիչը, բայց ընդդիմության մեջ հստակ առաջնորդի և օրակարգի բացակայությունը թույլ է տալիս Փաշինյանին բանավեճերում ազատվել քաղաքական հակառակորդներից, կարծում է փորձագիտական հանրությունը։
— Բագրատը բավականին ժողովրդականություն է վայելում, բայց խնդիրն այն է, որ ընդդիմությունն ընդհանուր առմամբ այնքան էլ հանրաճանաչ չէ, ինչը սահմանափակում է Բագրատի մանևրը։ Բացի այդ, գերակշռում են իշխանամետ սոցիալական ցանցերն ու լրատվամիջոցները,- մեկնաբանել է հայ քաղաքագետ Հրանտ Միքայելյանը։
Այնուամենայնիվ Նիկոլ Փաշինյանի հեռացման սպառնալիքն այժմ ամենաիրականն է վերջին երեք տարիների ընթացքում, շարունակել է փորձագետը: Սակայն, նրա գնահատականներով, ռիսկերը դեռ կրիտիկական մակարդակի չեն հասել, և իշխանությունները կարող են վերահսկել իրավիճակը։
-Հայաստանի բնակչության շրջանում ներկայիս վարչապետի քաղաքականության հավանության վարկանիշը ցածր մակարդակի վրա է՝ 9,1 %։ Փաշինյանի աշխատանքը բացասական է գնահատել մայիսի կեսերին հարցված հայերի 40 %-ը, 41,1 %-ը «բացարձակ բացասական» է վերաբերվում նրա քաղաքականությանը։ Քաղաքացիների միայն 19,1 %-ն է կարծում, որ վարչապետը չպետք է հրաժարական տա։ Սակայն փողոց դուրս եկողների թիվը բավարար չէ իշխանությունը փոխելու համար,- ասել է Հրանտ Միքայելյանը։
Նյութը հրապարակման պատրաստեց Կամո Խաչիկյանը
