Սա գյուղերի hայաթափման ծրագիր է, որը վաղ թե ուշ հասնելու է մյուս մարզեր
ՔԱՂԱՔԱԿԱՆՈՒԹՅՈՒՆ
Մինչ Կիրանցում այս պահին շարունակվում են սահմանազատման-սահմանագծման չափագրման աշխատանքները, հարևան Ոսկեպարում անհանգիստ են։ Գյուղում տրամադրությունները փոխվել են հատկապես այն ժամանակ, երբ սահմանային սյուները տեղադրվել են նաև Ոսկեպարի Սուրբ Աստվածածին եկեղեցու հարակից տարածքում։
«Մարտի 18-ին և ապրիլի 17-ին վարչապետի հանդիպման ժամանակ գյուղի մեծամասնությունը նրան ոչինչ չի ասել, չի հանդիմանել, որովհետև ինքն այնպես էր նկարագրել իրավիճակը, որ ինչ-որ տեղ նաև մենք ենք շահելու սահմանագծման գործընթացից։ Հիմա արդեն պարզ է, որ Բաղանիս հասնելու համար ճանապարհից ընդամենը 20 մետրի վրա պետք է զգանք ադրբեջանցիների ներկայությունը, և կամ եկեղեցուց քիչ ներքև կանգնած պիտի լինեն ադրբեջանցի սահմանապահները, ինչպե՞ս եք պատկերացնում այստեղ կյանքը։ Հիմա ոսկեպարցիք բոլորը միաձայն դեմ են այն ամենին, որի անունը դրել են սահմանազատում-սահմանագծում»,- MediaHub-ին իր մտահոգությունը հայտնեց Ոսկեպարի բնակիչներից մեկը։
Մեր զրուցակիցն ասաց, որ քանի օր է գյուղի տղամարդկանց մի մասը գտնվում է Կիրանցում։ Գնացել են տեղացիների հետ պայքարելու, որը, ցավոք, արդյունք չի տվել։
«Ասում եմ ձեզ, սահմանազատման գործընթացից հետո սահմանապահ այս գյուղերում սկսվելու է արտագաղթը, որովհետև այստեղ երեխա պահելու տեղ չէ, չենք վստահում ո՛չ Նիկոլի խոստումներին, ո՛չ էլ ադրբեջանցիների «խաղաղասիրությանը»»,- ասաց նա։
Նշենք, որ օրեր առաջ Նիկոլ Փաշինյանը հայտարարել էր, որ սահմանային սյունը տեղադրվել է Ոսկեպարի Սուրբ Աստվածածին եկեղեցուց բավականին հեռու, իսկ իրականում հեռավորությունն ընդամենը մի քանի մետր է։
Գյուղում մտավախություն ունեն, որ սահմանամերձ բնակավայրերին սպասում է Արցախի ճակատագիրը։
«Այո՛, սա գյուղերի հայաթափման ծրագիր է, որը վաղ թե ուշ հասնելու է նաև մյուս մարզեր, եթե ոչ Երևան»,- հավելեց մեր զրուցակիցը։
Հունան Թադևոսյան
