Հայաստանում առաջացել է Փաշինյանին հեռացնելու ունակ բաբան
ՔԱՂԱՔԱԿԱՆՈՒԹՅՈՒՆ
Հայաստանում բողոքի շարժման առաջնորդ Բագրատ արքեպիսկոպոս Գալստանյանը հայտարարել է Նիկոլ Փաշինյանի փոխարեն վարչապետի պաշտոնում իր թեկնածության մասին, գրում է vz.ru-ն։ Գալստանյանը դարձել է Հայաստանի և Ադրբեջանի միջև սահմանագծման մասին պայմանավորվածություններից հետո բողոքի հիմնական դեմքը։ Ինչո՞ւ է հոգևորականը դարձել երկրի գլխավոր ընդդիմադիրը և որքա՞ն են նրա շանսերը Փաշինյանի հետ առերեսվելիս։
«Ես շատ թերահավատորեն եմ վերաբերվում պարոն Գալստանյանի քաղաքական հեռանկարին: Արդյո՞ք նա իրական աջակցություն ունի հասարակության մեջ: Փաշինյանը, 2020 թվականի պատերազմում պարտվելով, մեկ տարի անց աջակցություն ստացավ հայերից և դարձյալ դարձավ վարչապետ»,- նշել է քաղաքագետ Յուրի Սվետովը։ Նրա խոսքով, վարչապետը հաշվի է առնում հայ հասարակության տրամադրությունները, որը խաղաղություն է ուզում, այլ ոչ թե պատերազմ։ «Նա պատրաստ է զոհաբերել ամեն ինչ, որպեսզի Հայաստանը, երբ ազատվի հակամարտություններից, ընդունվի ԵՄ և ՆԱՏՕ։ Նա քաղաքականություն է վարում Ադրբեջանի հետ խաղաղության պայմանագիր կնքելու ուղղությամբ»,- հավելել է փորձագետը։
«Գալստանյանի թեկնածությունը Հայաստանում շատերն ընկալում են որպես լավագույնը, քանի որ նա ոչ մի քաղաքական ուժի ներկայացուցիչ չէ և պատրաստ է աշխատել բոլորի հետ։ Նա շատ խարիզմատիկ անձնավորություն է և դարձել է վստահելի կոնսենսուսային գործիչ: Նա հայ եկեղեցու ներկայացուցիչն է, որը միավորող դեր է ունեցել Հայաստանի պատմության ընթացքում»,- ասել է «Ոսկանապատ» վերլուծական կենտրոնի ղեկավար, հայ քաղաքագետ Հրանտ Մելիք-Շահնազարյանը։
Փորձագետը Գալստանյանի վարչապետի պաշտոնին հասնելու ճանապարհին գլխավոր խնդիրն անվանել է երկքաղաքացիության առկայությունը, որն արգելում է նրան դիմել այս պաշտոնի համար, արքեպիսկոպոսն ունի կանադական անձնագիր։ «Որպեսզի Գալստանյանն արժանանա վարչապետի պաշտոնին, պետք է փոխել սահմանադրությունը։ Դրա համար հանրաքվե անցկացնելու կարիք չկա, բայց այդ գործընթացը կարող է երկար լինել և վատ մեսիջ կհղի, որ հիմնական օրենքը փոխվել է մեկ անձի համար: Ուստի հնարավոր է, որ հայտնվի մեկ այլ թեկնածու, որը հայտնի կդառնա առաջիկա օրերին»,- հավելել է բանախոսը։
Սվետովը վստահ է, որ Գալստանյանի երկքաղաքացիության հարցը նշանակություն չունի, եթե արքեպիսկոպոսը չունի համընդհանուր աջակցություն: «Փաշինյանը թոշակի անցած գործիչ չէ, նա շարունակում է վերահսկել հետախուզական ծառայությունները և բանակը: Հայաստանի խորհրդարանում իմպիչմենտի ընթացակարգն իրականացնողներ չկան: Նրան դեռևս աջակցում են Ռուսաստանի, Ֆրանսիայի և ԱՄՆ-ի հսկա հայկական համայնքները»,- ընդգծել է փորձագետը։
Գալստանյանի հռետորաբանությունը, վստահ է Սվետովը, կասկածի տակ է դնում նրա քաղաքական ապագան։ «Վեհափառն ասել է, որ Փաշինյանին մեկ ժամ է տալիս, որ նա հրաժարական տա։ Դա կարելի է ասել, եթե ձեր թիկունքում բանակ ունենայիք։ Ժամը վաղուց անցել է, և ոչինչ չի փոխվել»,- հավելել է փորձագետը:
Մելիք-Շահնազարյանը, սակայն, ընդգծել է, որ հայ հասարակության մեջ Փաշինյան գործիչը հեռացող է: «Ակնհայտ է, որ Փաշինյանի կապը ժողովրդի հետ այլևս չկա: Իշխանությունը պահպանելու նրա միակ հնարավորությունը ուժով է, ճնշելով բոլոր բողոքները։ Բայց դա չի աշխատի, քանի որ Հայաստանում դժգոհության մասշտաբները գերազանցել են հնարավորի բոլոր սահմանները։ Արդեն կա վստահություն, որ ի պատասխան վարչապետի ակտիվ գործողությունների մարդիկ ամենուրեք սկսելու են զանգվածային անհնազանդության ակցիաներ, ինչի արդյունքում Փաշինյանը կկորցնի իշխանությունը»,- վստահ է փորձագետը։
Նրա խոսքով, նույնիսկ իշխանության մեջ գտնվող կուսակցության պատգամավորների շրջանում մեծ անհանգստություն կա հնարավոր զանգվածային անկարգությունների վերաբերյալ, ինչի մասին վկայում են քաղաքական գործիչների նամակագրությունը, որը հայտնվել է համացանցում: «Եթե ընդդիմությունն աշխատի այդ ուղղությամբ, ապա կկարողանա ջարդել իշխանական պատգամավորների դիմադրությունը»,- վստահ է Մելիք-Շահնազարյանը։
Նյութը հրապարակման պատրաստեց Կամո Խաչիկյանը
