Ինչո՞ւ է Նիկոլ Փաշինյանը մեկնել Դանիա. մանրամասները` ըստ քաղաքագետի

Նիկոլ Փաշինյանը Դանիայի Թագավորությունում էր: Մայիսի 13-ից  Հայաստանի վարչապետը գնացել էր Դանիայում կայանալիք ժողովրդավարության գագաթնաժողովին մասնակցելու։ Իր այցի ընթացքում կառավարության ղեկավարը  հանդիպել է նաև Թագավորության վարչապետի, խորհրդարանի նախագահի և «Ռասմուսեն Գլոբալ» միջազգային քաղաքական կազմակերպության հիմնադիր Անդերս Ֆոգ Ռասմուսենի հետ։

Այս ընթացքում երկրում շարունակվում են բազմամարդ ցույցերն ու հավաքները, մեկ օրում  200-ից ավելի բերման ենթարկված եղավ հենց նրա մեկնման օրը:
Քաղաքագետ Արմեն Բադալյանի խոսքով` նրան պլանավորված այցի շրջանակներում էին հրավիրել և դժվար թե առաջարկը մերժեր:

«Դանիա միայն Հայաստանի վարչապետին չէին հրավիրել: Կարևոր է, որ «Ռասմուսեն Գլոբալ» միջազգային քաղաքական կազմակերպությունից հրավեր ուներ նաև Ուկրանիայի բարձրաստիճան ղեկավարությունը: Եթե չեմ սխալվում այնտեղ էր նաև Զելենսկու աշխատակազմի ղեկավարը: Այնտեղ պարզապես ժողովրդավարության հետ կապված միջոցառում էր և, բնականաբար, պիտի հրավիրվեր նաև Փաշինյանը»,- 1or.am-ի հետ զրույցում նշեց քաղաքագետը:

Ինչ վերաբերում է այն դիտարկումներին, որ երկրի այս իրավիճակում վարչապետը լքել է երկիրը,- Բադալյանն ասաց. «Չեմ կարծում, որ շարժումը հասել է ինչ-որ կրիտիկական կետի, որ պետք էր մնալ: Այս շարժումը դեռևս, այսօրվա դրությամբ իր համար վտանգ չի ներկայացնում, դրա համար էլ հանգիստ գնացել է: Այսօր խիստ սահմանափակ թվով փողոցներ են փակվել: «Ռասմուսեն Գլոբալ» միջազգային քաղաքական կազմակերպությունը սպասարկում է նաև Հայաստանի ոչ պաշտոնական արտաքին կապերը ԵՄ և ՆԱՏՕ անդամ երկրներում, դրա համար է այդ հանդիպումը տեղի ունեցել»:

Այն, որ իմպիչմենտի գործընթացի մասին է հայտարարվել, քաղաքագետի գնահատմամբ` անհանգստացնող չէ, քանի որ հանրային լայն ճնշում դեռ չկա, բացի այդ էլ գործընթացը հաջողելու համար անհրաժեշտ է ՔՊ մոտ 20 պատգամավորի ձայն, որը կարող է փոխվել միայն հանրային լայն ճնշմամբ: Իսկ եթե իմպիչմենտի գործընթացը հաջողություն չունեցավ, ապա 6 ամսով ընդդիմությունը նորից անվտանգության երաշխիք է տալիս իշխանությանը: