Իսկ ո՞վ ասաց, որ բիրտ ուժ է կիրառվում. ՆԳՆ խոսնակ Սարգսյան

Երեկ էլ եմ ասել, այսօր էլ եմ ասում՝ ներքին զորքերի ուժերին, ոստիկանությանը, հատուկ առանձնացված խմբին՝ հանդարտ մնացե՛ք, տղերք։ Այս մասին, այսօր՝ մայիսի 13-ին, անդրադառնալով վաղ առավոտից մեկնարկած անհնազանդության ակցիաների ժամանակ ոստիկանների կողմից իրականացված գործողություններին, լրագրողներին ասաց Բագրատ Սրբազանը։

«Ձեզ փչացնում են, փչացրել են, բայց դուք հնարավորություն ունեք վերականգնվելու։ Այս մարդիկ նաև ձեզ համար են պայքարում։ Ավելի լավ կլիներ, որ այդքան եռանդուն թշնամիների դեմ պայքարեիք, ոչ թե նրանց դեմ, ովքեր եկել են ձեզ էլ ազատագրելու»,-ասաց նա:

Մայիսի 9-ից սկսած` Սրբազանը գրեթե ամենօրյա ռեժիմով դիմում է ծառայություն իրականացնող ոստիկաններին, ապա նաև ՆԳ նախարար Վահե Ղազարյանին, ով Սրբազանի հարազատ Տավուշի մարզից է, ում անձմաբ ճանաչում է արքեպիսկոպոսը։ Նա Ղազարյանից պարզապես խնդրում է չփչացնել ոստիկաններին, հատկապես, որ արդեն իսկ որոշ չափով փչացրել են։ Հորդորում է ուժ չկիրառել, չանել անօրինական քայլեր՝ հիշեցնելով, որ պայքարը հենց ոստիկանների, ինչպես նաև ՆԳ նախարարի հայրենի մարզի ու հայրենիքի համար է։ Իսկ իրենց համար պայքարողների նկատմամբ բիրտ ուժ է կիրառվում խաղաղ անհնազանդության ակցիաների ժամանակ։

1or.am-ը կապ հաստատեց ՆԳՆ խոսնակ Նարեկ Սարգսյանի հետ՝ հասկանալու, թե Վահե Ղազարյանը ի՞նչ կարծիք ունի Սրբազանի կոչի վերաբերյալ և արդյո՞ք անսալու է դրան։ Իրեն դիմում է իր եկեղեցին և մի Սրբազան, ում անձամբ ճանաչում է։ Իհարկե, պետք է նշել նաև, որ չնայած Սրբազանի կոչին, ոստիկանության գործողություններից այսօր ևս քաղաքացիներ են տուժել՝ որոշների համար Շտապ օգնություն է ժամանել ոստիկանության Մաշտոցի բաժին, նույնիսկ լրագրողի ինքնազգացողություն է վատացել։

Նարեկ Սարգսյանը 1or.am-ի հարցին` հարցով է պատասխանում, իսկ ո՞վ ասաց, որ բիրտ ուժ է կիրառվում։
«Արդյո՞ք բիրտ ուժ չի համարվում, երբ մեկ հոգուն 8 ոստիկան է բերման ենթարկում, տեսախցիկները ֆիքսում են, թե ինչպես են հարվածում քաղաքացիներին՝ ոտքերով և բռունցքներով, ինչպես են հրում իր աշխատանքը կատարող օպերատորին և այլն։ Բայց այնուամենայնիվ հարցը վերաբերում էր Բագրատ Սրբազանի կոչին և Վահե Ղազարյանի արձագանքին»։ 1or.am-ի նման դիտարկմանն ի պատասխան` Սարգսյանն ասաց․ «Պարզապես բերման են ենթարկվում ոստիկանության օրինական պահանջը չկատարելու համար, որոշ դեպքերում էլ ծառայողական քննություններ են սկսված, ուրիշ այլ մեկնաբանություն չունեմ»։

Սարգսյանին կրկին հիշեցրինք, որ հարցը բացառապես վերաբերում էր Սրբազանի կոչին, որն ուղղված է Վահե Ղազարյանին։ Այս հարցով խոստացավ ավելի ուշ զանգահարել, հետադարձ զանգ լրատվականն այդպես էլ չստացավ, ինչպես նաև հետագա բազմաթիվ զանգերը մնացին անպատասխան։