Դեսպան Բուրլայը Հայաստանի ղեկավարությանը խորհուրդ է տվել կարդալ ՀԱՊԿ կանոնադրությունը
ՔԱՂԱՔԱԿԱՆՈՒԹՅՈՒՆ
Հայաստանը դեռևս Հավաքական անվտանգության պայմանագրի կազմակերպության (ՀԱՊԿ) անդամ է, սակայն չի ցանկանում լինել «այդ կոտրված մեխանիզմի մաս», Al-Jazeera-ին տված հարցազրույցում ասել է Հայաստանի արտգործնախարար Արարատ Միրզոյանը։
Դիվանագետն ընդգծել է, որ վերջին տարիների ընթացքում մի քանի անգամ ներխուժումներ են եղել Հայաստանի ինքնիշխան տարածք, ՀԱՊԿ-ի առաքելությունն է պաշտպանել անդամ երկրների ինքնիշխան տարածքներն ու սահմանները, սակայն «երբ տեղի ունեցան այդ ներխուժումները, մենք պատշաճ պատասխան գործողություն չտեսանք կազմակերպության կողմից, որի անդամն ենք»:
Ռուսաստանի Դաշնության արտակարգ և լիազոր դեսպան, Մոսկվայի պետական լեզվաբանական համալսարանի վաստակավոր պրոֆեսոր Յան Բուրլայը «svpressa.ru»-ին տված հարցազրույցում նշել է, որ Ռուսաստանը կարող է և պետք է զարգացնի հարաբերությունները Հայաստանի հետ որպես պետություն, բայց ոչ Նիկոլ Փաշինյանի այն իշխանության հետ, որն անընդհատ այս ու այն կողմ է ընկնում և բացարձակապես չի հասկանում այդ համաձայնագրի էությունը:
«Նա ՀԱՊԿ-ի նկատմամբ պրիմիտիվ, սպառողական մակարդակի վերաբերմունք ունի: Ռուսաստանը և համաձայնագրի մյուս կողմերը պետք է ապահովեն Հայաստանի անվտանգությունը։ Պրիմիտիվիզմ: Դուք, պարոն Փաշինյան, երբևէ մտածե՞լ եք Ռուսաստանի Դաշնության անվտանգության մասին։
ՆԱՏՕ-ն շարժվում է դեպի ռուսական սահմաններ, դուք դրա դեմ բան ասե՞լ եք։ Մտքով էլ անգամ չի անցել: Պարզունակ ու թշվառ մտածողություն»,- պարզաբանել է հրատարակության զրուցակիցը։
Բուրլայը հիշեցրել է, որ համաձայնագիրն ինքնին բավականին մտածված է և մանրամասն։ Համաձայնությունը ձեռք է բերվել լուրջ դիվանագիտական բանակցությունների արդյունքում։ Իսկ «կոլեկտիվ անվտանգություն» արտահայտությունն ինքնին կարծես թե լրացուցիչ բացատրություն չի պահանջում։
«Ոչ միայն Հայաստանի, այլ նաև անդամ բոլոր երկրների անվտանգությունը։ Դե, կարդացեք կանոնադրությունը: Բայց չէ՞ որ կարող էր դիմել իր հայ եղբայրներին, օրինակ Ֆրանսիայում հզոր սփյուռք կա։ Կարելի էր ասել նրանց. տեսեք, թե ինչ է անում ձեր երկրի ղեկավարությունը, փորձեք ազդել, ճնշում գործադրել։ Բայց ոչ, բողոքները շարունակվում են, որ Ռուսաստանն է վիրավորել իրենց»,- հավելել է դեսպանը։
Նյութը հրապարակման պատրաստեց Կամո Խաչիկյանը
