Գրողների միությունն այսօր կհայտարարի՝ միանո՞ւմ է շարժմանը

Հայաստանի գրողների միությունն այսօր հայտարարություն է տարածելու՝ արդյո՞ք միանում են «Տավուշը հանուն հայրենիքի» շարժմանը:

Տեղեկությունը 1or.am-ին հայտնեց Գրողների միության մեր վստահելի աղբյուրը:

Մի քանի տեքստ է գրվել գրողների միության նախագահի և մի քանի անդամի կողմից: Երբ հայտարարությունը պատրաստ է եղել հրապարակման, միության նախագահ Էդվարդ Միլիտոնյանն ասել է, որ պետք է ձեռնպահ մնալ այն հրապարակելուց առնվազն մինչև մայիսի 9-ը:

Երբ մայիսի 9-ին Հանրապետության հրապարակում Սրբազանը հայտարարեց, թե Նիկոլ Փաշինյանին հրաժարական ներկայացնելու մեկ ժամ ժամանակ է տալիս, գրողների մեջ հակասություն է սկսվել, ոմանք սատարել, ոմանք էլ հրաժարվել են: Հայտարարությունն այդպես էլ ընդհանուրի անունից կազմել չի հաջողվել:

Էդվարդ Միլիտոնյանն էլ որոշել է, որ ինքը միայն իր անունից հայտարարություն կանի: Տեղեկությունը ճշտելու համար 1or.am-ը կապ հաստատեց Էդվարդ Միլիտոնյանի հետ, ով ասաց. «Գրողները 500-600 հոգի են, ես բոլորի անունից չեմ կարող հայտարարել` միանում են շարժմանը, թե ոչ:

Անձամբ իմ անունից այսօր կխոսեմ, բովանդակությունը չեմ մանրամասնի հիմա: Իմ կարծիքը կհիմնավորեմ իմ խոսքում ու էլ հարցեր չեն առաջանա»:

Հիշեցնենք, որ ՀՀ գլխավոր դատախազությունը հայց է ներկայացրել ՀՀ կադաստրի կոմիտեի դեմ և պահանջում է անվավեր ճանաչել Հայաստանի գրողների միության շենքի մասնավորեցումը:

Միլիտոնյանը և որոշ գրողներ այս առթիվ տարբեր քննադատություններ էին հնչեցնում՝ գործընթացը համարելով անթույլատրելի: Միլիտոնյանը 1or.am-ի հետ զրույցում նույնիսկ խոսել էր միությունը փակման տանելու և շենքը վաճառելու կառավարության հեռահար ծրագրերի մասին: